Foto: okg.kz
Nietqabyl Berkinbaev áýeli aýdanda shoferlyq kýrsta oqydy. 1970 jyly Jambyl memlekettik pedagogikalyq institýtyna oqýǵa túsip, 1974 jyly bitiredi. Institýt qabyrǵasynda júrgende boks sektsiiasyna qatysyp, sol qaladaǵy oqý oryndary arasynda ótkizilgen birinshilikterde birinshi oryndar men júldeli oryndardy ielenip, jeńis tuǵyrynan kórinip júrdi. 1972 jyly Jambyl qalasynyń chempiony bolady. 1974 jyly Sholaqqorǵan aýylyndaǵy №14 mektep-internatqa qabyldanyp, muǵalim jáne tárbieshi bolyp qyzmet atqardy. 1977 jyly aýdandyq bilim bólimine kadr jónindegi orynbasary bolyp qyzmet aýystyrady. Sol jyldary Lánde Bókenov, Saǵyntai Baidildaev, Kópei Sherniiazov siiaqty bilimdi, bilikti basshy ustazdarmen tize qosa júrip qajyrly eńbek etedi. Aǵalarynan tálim-tárbie alady. Eńbegi janyp, Qazaq SSR oqý aǵartý isiniń úzdigi atanady.
– 2010 jyly zeinetkerlikke shyqtym. Oǵan deiin otbasymyzben mal bordaqylaý jumysymen ainalystyq. Ol ýaqytta ustazdarǵa ailyqpen bala-shaǵany asyraý qiyndaý bolatyn. Onyń ústine olardy oqytý kerek, kiindirý kerek, qala berdi erjetkenderin úilendirý kerek. Memleketten nesie alǵan joqpyz. «Bereke» sharýa qojalyǵyn ashyp, balalarymmen birigip jumys jasadym. Otbasymda tórt ul, bir qyzym bar. Qyzym anasyna kómektesedi. Uldarym qasymda bolyp, jumysty bastadyq. Sharýa qojalyǵynyń ieliginde tórt túliktiń bári bar. Qumdaǵy Jamanaida 400 gektar jaiylymdy jerimiz, taý bókterinde 600 gektar jerimiz bar. Sholaqqorǵan aýylynan 20 adamdy turaqty jumyspen qamtyp otyrmyz. Al, ýaqytsha maýsymdyq naýqanda 15 adam kómekke keledi, – deidi Nietqabyl aǵa.
Olar otbasymen «Qaisar» saýda dúkenin, «Qaisar» janar-jaǵarmai quiý beketin, «Qaisar» naýbaihanasyn ashady, «Qaisar» toihanasyn iske qosady. Uldary Jantóre, Asylbek, Kúntóre, Jazylbek aýdan, oblys kólemindegi mádeni-sporttyq sharalarǵa demeýshilik jasaidy. Jantóre jylqylardy asyldandyrý jumystarymen ainalysyp, at sporty sharalaryna qatysady. Atbegilik óneri de bar. Asylbek «Úsh arys» qaýymdastyǵynyń Sozaq aýdanyndaǵy filialynyń tóraǵasy.
Búginde Nietqabyl Berkinbaevtyń 75 jasqa tolýyna orai bokstan jasóspirimder arasynda respýblikalyq týrnir ótkeli jatyr. Kezinde Amalbek Tshanov, Kókimov, Mýhitdinov siiaqty bylǵary qolǵap sheberlerimen qolǵap túiistirgen aǵamyz áli de attan túse qoiǵan joq. Ol nemerelerin osy sport túrine baýlyp júr.
– Adal eńbek adamǵa aldymen abyroi, odan keiin otbasylyq baqyt, qýanysh ákeletinin balalaryma udaiy aityp otyramyn. Keshegi ata-babalarymyz bir japyraq nan úshin, urpaqtarynyń amandyǵy, saýlyǵy úshin qandai azapty jol júrdi. Olardyń taý asyp, ózen keship, jalań aiaq jar basyp júrgenin umytpańdar deimin, – deidi Nietqabyl aǵa aǵynan jarylyp.
Maqsat Qarǵabai,
«Ońtústik Qazaqstan»
Sozaq aýdany.
