Foto: okg.kz
Arys qalasynyń «Poshta» shaǵyn aýdanynda Baqsultan Ábdirazaq esimdi azamat turady. Jasy 28-ge kelgen Baqsultan 3 balanyń ákesi. Kelinshegi úi sharýasynda. Ózderi páter jaldap turady. Otaǵasynyń jumysqa turý nieti bolǵanymen, laiyqty jumys tabyla qoimady. Osy sebepti ol óziniń jeke kásibin ashýǵa bel býdy. Jospar túzdi. Shyǵyndaryn eseptedi. Aqyry shaǵyn jihaz qurastyrý tsehyn ashamyn dep sheshti. «Bastaý biznes» baǵdarlamasy boiynsha onlain oqyp, sertifikat aldy. Osydan keiin jumyssyzdarǵa arnalǵan memlekettik grantqa ótinim tapsyrdy. Nátijesinde komissiia aldynda biznes josparyn qorǵaǵan Baqsultannyń baǵy jandy.
Baqsultannyń áreketi kópke úlgi deýge bolady. Ol úiinde jatyp alyp, qur qiialdaǵan joq. Jaldamaly páterde tursa da kásip ashýǵa umtyldy. Qarashańyraqtaǵy ákesiniń bos turǵan garajyn surap aldy. Qandai qurylǵylar kerektigin anyqtap, olardyń baǵasyn bildi. Qarjysy qolǵa tie salysymen josparlaǵan zattaryn satyp aldy. Búginde shaǵyn kásibin dóńgeletip otyrǵan jigittiń tsehyna biz de bas suqtyq. Shaǵyn tsehtyń ishi tap-tuinaqtai. Kishkentai sheberhanada as úige arnalǵan úlken jihaz qurastyryp jatyr. Kásibi ózine unaityny ańǵarylyp tur.
– Ákeme kelgen saiyn bos turǵan garajyna kózim túsetin. Aǵash kesýge, odan túrli buiymdar jasaýǵa degen qyzyǵýshylyǵym burynnan bar bolatyn. Sheberhana orny bar, nege qarjy taýyp, ásip ashpasqa degen oi mazalai berdi. Aqyry osy iske bet burdym, – dedi Baqsultan.
Jihaz jasaýǵa alǵan qurylǵylarynyń ishindegi úlkeni «ýglorezdiń» qyzmeti orasan. Ol burysh shyǵarady. Ózine qajet buryshty dál ólshep beredi. Ony ólshemge sai kesedi. Bul qurylǵy 320 myń teńge turady eken. Aǵashty tilip túser freza apparaty men shlifovkanyń, odan keiin lobziktiń de atqarar qyzmeti kóp. Garajdan taǵy perferatordy, tokqa qosylatyn drel baiqadyq. Bárinen de mańyzdysy osy dep kásipker bizge kompressoryn kórsetti. Baǵasy 240 myń teńge eken. Oiǵysh qyzmetin atqaratyn ol kýpeli jihazǵa taptyrmas qural deidi.
«Jihaz qurastyrýǵa memleketten berilgen 1 476 800 teńgeniń esebin túgel tapsyrdym. Barlyǵyn tiynyna deiin maqsatty jumsadym. Eń bastysy, jihaz qurastyramyn degen armanyma jettim» deidi kásibin dóńgeletip otyrǵan azamat.
Baǵy janǵan Baqsultan grant utyp alǵaly bergi bes-alty aida 11 úidiń as bólmesine sán berip úlgeripti, iaǵni osynsha jihaz jasaǵan. Janyna kómekshi alǵan. Sanaýly aidaǵy nátijesi jaman emes. Tabysy da artyp keledi. Qolǵa alǵan kásibi ózine unaidy. Isine jaýapkershilikpen qaraidy. Ázirge tek tapsyryspen ǵana jihaz qurastyryp júr. Bolashaqta ónimderin bazarǵa shyǵarý nieti bar. Shaǵyn dúken ashsam degen armany da joq emes.
P.S. Keńes dáýirinde jihaz shyǵarý isi jekeniń qolynda bolǵan joq. Túrli jihazdar memlekettik fabrikalarda ǵana shyǵarylyp keldi. Sol zamanda shet elderden keletin ónimderdi aitpaǵanda, Reseiden, Belorýssiiadan shyǵatyn jihazdar suranysqa ie edi. Bizdiń óńirdiń dúkenderine Almatydan, Tashkentten, tipti osy Shymkentten de jihaz keletin. Onyń ishinde as úige arnalǵany az bolatyn. Tipti joqtyń qasy edi. Dúkenderge jetetin sanaýly jihaz jalpy jurtqa qoljetimsiz bolǵany jasyryn emes. Elimiz táýelsizdik alǵaly beri jihaz óndirisi zor qarqynmen damydy. Úlken fabrikalarmen birge ózge jekemenshik sala da qarqyn aldy. Eń aqyry jeke azamattar da óz úiinde otyryp-aq, paidalaný maqsatyna qarai túrli jihazdar jasap shyǵara alatyn dárejege jetti. Kásibin endi ashqan Baqsultannyń da armany asqaq. Aldyna maqsat qoia bilgen azamatqa «nietińe jet» degennen basqa ne aitarsyń!
Erlan Qýandyq,
«Ońtústik Qazaqstan».
