Astanada emhana qarajatyn asa iri mólsherde jymqyrǵan tórt basshy men laýazymdy tulǵa sottaldy. Keltirilgen shyǵyn kólemi 672,7 mln teńge bolǵan, dep habarlaidy ult.kz.
Sot málimetinshe, qylmystyq shema 2021-2025 jyldary jumys istegen. Shemany uiymdastyrǵan áiel kásiporynnyń ekonomikalyq jumys qyzmetiniń basshysyn, bas esepshisin jáne memlekettik satyp alý menedjerin iske tartqan. Olar jalǵan kelisimsharttar arqyly kásiporyn qarajatyn ózderine bailanysty tulǵalardyń shottaryna aýdaryp, keiin qolma-qol aqshaǵa ainaldyrǵan.
Sonymen qatar kásiporyn aqshasyna 7 mln teńgeden astam turmystyq tehnika satyp alynǵan. 2023 jyly uiymdastyrýshy men taǵy eki sottalýshynyń Italiiaǵa jeti kúndik saparyna 7,8 mln teńge jumsalǵan. Al 2023-2025 jyldary uiymdastyrýshy jeke nesiesin óteýge kásiporyn qarajatynan shamamen 2,2 mln teńge paidalanǵan.
Sot tórt adamdy da kináli dep tanydy. Uiymdastyrýshy 8 jylǵa, ekonomikalyq jumys qyzmetiniń basshysy 7 jyl 6 aiǵa, bas esepshi men memlekettik satyp alý menedjeri 7 jylǵa bas bostandyǵynan aiyryldy.
Bas esepshige qatysty jazany oryndaý 2027 jylǵy 30 qyrkúiekke deiin keiinge qaldyryldy.
Sottalǵandardyń barlyǵyna belgili bir laýazymdardy atqarýǵa jáne belgili bir qyzmetpen ainalysýǵa ómir boiyna tyiym salyndy. Jábirlenýshi taraptyń azamattyq talaby tolyq qanaǵattandyryldy.
