QR Densaýlyq saqtaý vitse-ministri Oljas Ábishev elektrondyq densaýlyq pasporty qalai jumys isteitinin ózi tekserip kórgenin aitty, dep habarlaidy QazAqparat.
«Eki apta buryn Nur-Sultan qalasyndaǵy №6 emhanaǵa bardym. Men sol emhanada tirkelgenmin. Júieniń qalai jumys istep turǵanyn tekserý úshin ózimmen birge uialy telefon men jeke kýáligimdi ǵana ala bardym», - deidi ol.
Vitse-ministr ol emhanaǵa kóp adam qaralatynyn aitty.
«Ol - standartty emhana. Men smartfon arqyly dárigerge aldyn ala jazylyp, olar jeke kýáligim arqyly men týraly jazbalardy kórsetti. Eshqandai ambýlatoriialyq karta bolǵan joq», - deidi ol.
Ol azamattyń qalaýy boiynsha meditsinalyq jazbalardy qaǵazǵa shyǵaryp berýge bolatynyn aitty.
«Meditsinalyq jazbalardy qolǵa shyǵaryp berýge tyiym salynbaǵan. Biraq keńes alý men dári-dármek jazyp berýge deiingi melitsinalyq qyzmet túrlerin osy elektrondyq densaýlyq kartasy arqyly aldym. Dárigerge eki apta jótelip, tamaǵym aýyrǵanyn aityp edim, ol ishetin dári-dármek týraly málimetti elektrondy formatta berdi. Aimaqtarda tehnikalyq máseleler týyndaityn shyǵar, biraq munyń bári - sheshiletin másele», - deidi Oljas Ábishev.
