Green Tal sheberhanasynyń jetekshisi ári kásipkerlik mektebiniń negizin qalaýshy Emin Áskerov áleýmettik qoldaý kórsetýdiń mańyzyn túsindirdi, dep habarlaidy QazAqparat.
«Áleýmettik kásipkerler – bul kez kelgen áleýmettik máselelerdi sheshýge baǵyttalǵan kásiporyndardy quratyn adamdar. Mysaly óz basym 2015 jyly Green Tal áleýmettik sheberhanasynyń negizin qaladym. Ol 9 túrli baǵyttan turady. Olar: aǵash ustasy, tigin, kiiz sheberhanalary, kafeler, avtokólik jýý jáne taǵy basqa. Biz áleýmettik sanattaǵy azamattardy jumyspen qamtý máselelerin sheshemiz. Bizdiń joba sheńberinde 80-ge jýyq qyzmetker eńbek etedi, olardyń 95%-y áleýmettik sanatqa jatatyn azamattar. Árine, biz jastarǵa nazar aýdarýǵa tyrysamyz. Óitkeni olar oilaǵanyn iske asyra almai shektelse, qinalatynyn túsinemiz», - dedi Emin Áskerov onlain rejimde «Bolashaq» qaýymdastyǵynyń uiymdastyrýymen ótken «Jastar jáne innovatsiialar» forýmynda.
Onyń aitýynsha keiingi kezderi ókinishke qarai Qazaqstanda shizofreniia men aýtizm aýrýy bar balalardyń sany ósip bara jatyr.
«Siz dispanserlik esepte tursańyz, onda ókinishke qarai jumysqa qabiletsiz azamat sanalasyz. Biz bul taptaýryndy buzyp, olai emes ekenin naqty mysaldarmen dáleldeýge tyrysamyz. Ol sanattaǵy azamattar - ózderin jumys ornynda shynymen kórsete alatyn qyzmetkerler. Barlyq jumysymyz arqyly áleýmettik sanattaǵy azamattar teń múmkindikterge laiyqty bolýyn dáleldegimiz keledi», - deidi ol.
Emin Áskerov Qazaqstanda áleýmettik kásipkerlik týraly zań ázirlenip jatqanyn, al Reseide soǵan uqsas zań ótken jyly qabyldanǵanyn málim etti.
«Mysaly Qazaqstanda 300-ge jýyq áleýmettik kásipker bar. Al Ulybritaniiada olardyń sany 70 myńnan asady. Ol eldegi áleýmettik kásipkerlerdiń salyqtyq túsimderinen túsetin soma JIÓ-niń 10%-dyq úlesin quraidy. Áleýmettik kásipkerler áleýmettik máselelerdi sheship qana qoimai, memlekettik biýdjetti tolyqtyrady», - dedi Emin Áskerov.
