Shymkentte II toptaǵy múgedektigi bar áiel psihikalyq densaýlyq ortalyǵynda em alyp jatqan kezde ózine tiesili úii, jer telimi men páterinen aiyrylǵan. Alaida ol sot arqyly múlkin qaitara aldy, dep habarlaidy ult.kz.
Joǵarǵy sottyń málimetinshe, is materialdaryna sáikes, áiel senimhattar men jyljymaityn múlikti satyp alý-satý sharttaryn jaramsyz dep tanýdy surap sotqa júgingen. Ol bul qujattardyń qandai jaǵdaida rásimdelgeninen beihabar bolǵanyn jáne óz múlkin satýǵa eshqashan kelisim bermegenin aitqan.
Talap qoiýshynyń málimetinshe, qujattarǵa qol qoiylǵan kezde ol oblystyq psihikalyq densaýlyq ortalyǵynda statsionarlyq em qabyldap jatqan. Áieldiń aitýynsha, osy jaǵdaidy paidalanǵan eki notariýs pen úsh týysy senimhat rásimdep, keiin onyń jer telimi bar turǵyn úii men páterin satyp jibergen.
Sot barysynda týystary senimhat negizinde áieldiń atynan áreket etip, onyń jyljymaityn múlkin ielikten shyǵarǵany anyqtaldy. Sonyń saldarynan ol jalǵyz baspanasynan aiyrylyp, týystarynyń úiinde turýǵa májbúr bolǵan.
Sot-psihiatriialyq saraptama talap qoiýshynyń 2019 jyldan beri psihikalyq syrqatqa shaldyqqanyn jáne qujattarǵa qol qoiǵan sátte óz áreketiniń mánin tolyq túsinip, oǵan baqylaý jasai almaǵanyn rastaǵan.
Osy dálelderdi eskergen sot senimhattar men olardyń negizinde jasalǵan satyp alý-satý mámilelerin jaramsyz dep tanydy. Nátijesinde taraptar bastapqy quqyqtyq jaǵdaiyna keltirilip, áieldiń úii, jer telimi men páterine qatysty múliktik quqyqtary tolyq qalpyna keltirildi.
Joǵarǵy sottyń málimetinshe, bul sheshim zańdy kúshine endi.
