Burynǵy Densaýlyq saqtaý ministri Eljan Birtanovqa qatysty qylmystyq is astanalyq sotqa tústi. Nur-Sultan qalalyq sotynyń baspasóz qyzmetiniń málimetinshe, is áli óndiriske qabyldanǵan joq, dep habarlaidy Sputnik Qazaqstan.
"Qylmystyq-protsestik kodeks normalaryna sáikes, sýdia kelip túsken is boiynsha bes táýlik ishinde jalpy nemese qysqartylǵan tártippen basty sot talqylaýyn taǵaiyndaý týraly ne isti aldyn ala tyńdaýdy júrgizý týraly sheshim qabyldaidy", – delingen sottyń baspasóz qyzmeti usynǵan aqparatta.
Iske qatysty ózge málimet keiin habarlanatyny aityldy.
Buǵan deiin sot Birtanovty úiqamaqta ustaý merzimin 14 qańtarǵa deiin uzartqan bolatyn. Ol kezde eks-ministr is materialdarymen tezirek tanysýy úshin sýdiadan úiqamaqtan bosatýyn suraǵan edi. Birtanov úiqamaqta bolǵandyqtan, ózi jáne advokattary jumys kúnderi materialdardy fotoǵa túsiretinin alǵa tartty. Ol 13 qańtarda qarjy monitoringi agenttigi tarapynan tergeý júrgizý kezinde zań óreskel buzylǵany týraly shaǵymy men Bas prokýratýraǵa ótinishi qaralmaǵanyn, biraq aiyptaý aktisi bekitilgenin málimdedi. Eks-ministrdiń advokaty Bas prokýrorǵa júgindi.
Birtanovtyń isi
Eljan Birtanov 2020 jyldyń 7 qarashasynan bastap úiqamaqta. Ol bastapqyda biýdjet qarajatyn asa iri mólsherde jymqyrdy degen kúdikke ilindi, keiin bap "qyzmettik ókilettigin teris paidalaný" dep ózgertildi.
Sot otyrystarynda Birtanov jemqorlyqqa qatysy joq ekenin birneshe ret málimdedi. Burynǵy ministr laýazymdyq ókilettigin teris paidalanǵanyn da moiyndamady.
