Densaýlyq saqtaý ministri Eljan Birtanov dárigerlerdiń koronavirýs juqtyrý faktileriniń bári tekseriletinin málim etti, dep habarlaidy QazAqparat.
«Sońǵy derekter boiynsha elimizde koronavirýs infektsiiasyn juqtyrǵan 579 meditsinalyq qyzmetker bar. Jalpy karantin kezeńinde dál osy dárigerlerdiń virýsty juqtyrý qaýpi joǵary», - dedi Eljan Birtanov Tengriniýs Instagram paraqshasynyń tikelei efirinde.
Ministrdiń aitýynsha, qazirgi tańda elimizde koronavirýs juqtyrǵan azamattardyń 80 paiyzy aýrýdy belgisi joq kúide kóteredi.
«Elde koronavirýs juqtyrǵandar sany az bolǵan kezde bárin testten ótkizýdiń qajettigi týyndamady. Alaida máselen aýrýhanaǵa qolyn syndyryp túsip jatqandardyń ózinen koronavirýs anyqtalyp jatty. Olardy birinshi qabyldap, emdeitin dárigerler. Olar osylaisha dárigerlerge virýs juqtyrýy múmkin. Sol sebepti meditsina qyzmetkerleriniń aýrýdy juqtyryp alýy bárimizge ońai tiip turǵan joq. Naýqastarmen tikelei jumys júrgizip jatqandar da solar. Ekinshiden kei jaǵdaida sanitarlyq talaptardyń saqtalmaýy da sebep bolatyny bar», - dedi ol.
Eljan Birtanov dárigerlerdiń koronavirýsty juqtyrýynyń árbir oqiǵasy boiynsha epidemiologiialyq tergeý júrgiziletinin eske saldy.
«Meditsina qyzmetkerleriniń naýqastanyp jatqanyn kórip otyrmyz. Alaida bul máseleniń mańynda qoldan jasalǵan dúrbeleńdi týǵyzbai-aq qoialyq. Burys baǵa berýdiń qajeti joq. Zańdy túrde máseleniń anyq-qanyǵyna jetýge mursat berińizder. Bizdiń ǵana tekserýimiz emes, prokýratýra sekildi baqylaý organy da bul máselemen jiti ainalysady. Eń bastysy – aýrýdyń jeńýge mańyz berip, epidemiiaǵa qarsy jumys júrgizýge múmkindik berińizder», - deidi Eljan Birtanov.
