QR Densaýlyq saqtaý ministri Eljan Birtanov el azamattaryna Ońtústik Koreiaǵa barmaýǵa keńes berdi, dep habarlaidy QazAqparat.
«Biz Ońtústik Koreiadaǵy ahýaldy jiti qadaǵalap otyrmyz. Ótken táýliktiń ishinde odan arǵy kúnge qaraǵanda ósim qarqyny shamamen 48 paiyzdy qurady. Bul óte joǵary qarqyn sanalady. Ókinishke orai, artý tendentsiiasy baiqalady. Qytaida ósimniń eń joǵary qarqyny táýligine 65-70 paiyz bolǵan edi. Sondyqtan eger jaǵdai kúrdelenip, patsientter sany men ósim qarqyny qaýip tóndiretindei bolsa, onda biz batyl sharalar qabyldaimyz. Búgingi kúngi másele qaityp kelgenderdi karantinge jatqyzý bolyp otyr. Shekarany jappaǵanmen 1 naýryzdan tasymal sanyn qysqartamyz. Múmkindiginshe ol jaqqa barmaýǵa keńes beremiz. Óitkeni, olardyń barlyǵyn keiin alyp kelýge týra keledi. Qazirgi ýaqytta qansha azamatymyzdyń elge oralǵysy keletindigi týraly máseleni talqylap jatyrmyz. Ázirshe Koreiada qaýip deńgeii aitarlyqtai joǵary emes», - dedi ministr BAQ ókilderimen kezdesýinde.
Onyń dereginshe, búginde Ońtústik Koreiada 30 myń Qazaqstan azamaty júr.
«Aitalyq, olardyń 25 myń elge oralǵysy keledi. Al bul óte úlken mólsher. Bizde juqpaly aýrýlar aýrýhanalarynda rezervtik oryndardyń sany shamamen 7 myń ǵana. Buǵan qosa, shamamen 3,5 myń meditsinalyq uiymdy karantinge ainaldyra alamyz», - dedi Eljan Birtanov.
Ministrdiń aitýynsha, bul oryndar da jetpei jatsa, onda shetelden kelgen azamattar oqshaýlanady. Oqshýlanǵan adamdarǵa qolaily turmystyq jaǵdai jasalady.
«Bul bas bostandyǵynan aiyrý emes, tek karantin ǵana. Airyqsha jaittarda qabyldanatyn shara. Bizdiń oiymyzsha, kóp jaǵdaida úi karantininiń ózi de jetkilikti bolady. Óitkeni, 14 kúnnen keiin biz onyń aýyrǵanyn ne aýyrmaǵanyn bile alamyz. 14 kún kúnnen keiin aýrý juqtyrmaǵanyna, qaýiptiń joqtyǵyna kóz jetkizgennen soń karantindy jalǵastyrý qajet bolmaidy», - dedi ol.
