QR Densaýlyq saqtaý ministri Eljan Birtanov baqylaý keńesterin qurý máselesin kóterdi, dep habarlaidy QazAqparat.
Onyń aitýynsha, baqylaý keńesterin qurý tiziminde Mańǵystaý oblysy men Shymkent kóshtiń sońynda qalǵan.
«100 naqty qadam - Ult jospary» aiasynda Elbasynyń korporativti basqarýdy engizý tapsyrmasy bar. Bul 2015 jyly boldy. Ótken jyly osy baqylaý keńesterin qurý týraly meniń buiryǵym shyqty. Ákimdik (Mańǵystaý oblysy - red.) buiryqty elemei otyr. Bul - úlken júieli másele. Ashyqtyq joq jerde, qoǵam oqiǵadan habarsyz jerde dárigerlermen, qural-jabdyqtarmen túrli máseleler bolady. Men Sizderge bir ai ýaqyt beremin. Bir aida qoǵam men biznes aldynda esep beresizder. Muny ózim qadaǵalaimyn!, - dedi Eljan Birtanov QR Densaýlyq ministrligi alqasynyń otyrysynda.
Aita keteiik, elordada 2019 jyldyń jartyjyldyǵyna arnalǵan QR Densaýlyq saqtaý ministrligi alqasynyń otyrysy ótip jatyr. Otyrysta 2016-2019 jyldary densaýlyq saqtaýdy damytýǵa arnalǵan «Densaýlyq» memlekettik baǵdarlamasy, 2019-2020 jyldarǵa arnalǵan bastapqy meditsinalyq-sanitarlyq kómekti damytý sharalarynyń jospary, 2019 jylǵa arnalǵan QR ana ólimin azaitý boiynsha jedel jospar, 2019-2021 jyldardy qamtityn balalar ólimin azaitý boiynsha sharalar jospary, kadrlyq qamtamasyz etý jáne densaýlyq saqtaý salasynyń qyzmetkerlerin áleýmettik qoldaý, densaýlyq saqtaý salasyna investitsiialar tartý máselesi qaralady.
