Túrkistan qalasyndaǵy №9 Nekrasov atyndaǵy mektep-gimnaziiasynyń ǵasyrǵa jýyq tarihy bar. Kóne zamannan syr shertetin osy bilim uiasynyń shákirtteri men ustazdary 1967 jyly HHI ǵasyr turǵyndaryna arnap hat jazyp, ony mektep aýlasyndaǵy soǵys qurbandary eskertkishiniń irgetasyna arnaiy qorapqa salyp qaldyrǵan. Atalǵan hattyń elý jyldan soń ashylýy amanat etilgen. Osy amanat hatty ashý búgingi urpaqtyń enshisine buiyrypty. Mektep ujymy men ata-analar komitetiniń basqosýymen 4 qazan kúni saltanatty jaǵdaida elý jyl burynǵy oqýshylar men ustazdardyń amanaty ashylyp, kópshilik aldynda oqyldy, dep jazady "Ult aqparat".
Orys tildi mektep bolǵandyqtan hat sol tilde jazylǵan (qazir qazaq jáne orys aralas mektep-gimnaziiasy). Munda mektep ǵimaratynyń 1939 jyly salynǵany, ol Túrkistan qalasyndaǵy tuńǵysh eki qabatty nysan ekendigi atap kórsetilgen. Mektep ainalasy tap-taqyr topyraq bolǵany, odan beride shákirtter men ustazdardyń birlesip, jemis aǵashtarynyń otyrǵyzylǵandyǵy jáne sol aǵashtardyń máýeli baqqa ainalǵandyǵy jazylǵan. Sonymen birge, hatqa Uly Otan soǵysynyń qasireti de arqaý bolypty.
Mektep-gimnaziia direktory J.Orynbaevanyń aitýynsha elý jyl buryn hatty salý rásimine ie bolǵan Osipova Olga, Shmarin Mihail, Gúlhan Sádiqyzy jáne Shprina Nelli bul jiynǵa arnaiy shaqyrtylǵan. Rýhani sabaqtastyqty jańǵyrtýǵa baǵyttalǵan shara mektep qabyrǵasynda áli de jalǵasýda. Bilim uiasyndaǵy ár synypta tárbie saǵattary uiymdastyrylyp, rýhani jańǵyrý baǵdarlamasymen orailastyrylǵan igi istiń máni men mazmuny túsindirilýde.
Elý jylda el jańa degendei búgingi kúnderi eńsesi báseńdegen bul eki qabatty mektep janynan 4 qabatty oqý ǵimaraty, sport zaly men akt zaldary boi kótergen. Budan bólek qala kóleminde toǵyz qabat biiktikke deiin túrli nysandar boi kótergenin aitsaq, sońǵy elý jyl ishinde jańa Túrkistannyń qalyptasqanyn kózge elestetý qiyn emes.
Osylaisha áserli basqosýdyń sońy búgingi mektep ujymynyń 2037 jyly oqylýy tiis hat jazylyp atalǵan eskertkishtiń irgetasyna ornatyldy. Hatta álemdegi damyǵan elý eldiń qataryna qadam basqan elimizdiń muraty qazaq, orys jáne aǵylshyn tilderinde baiandalǵan. Ondaǵy maqsat latyn qaripine kóshý naýqany basty nazarǵa alynsa, qazaq, orys tilderi mekteptiń baǵytyna sai negizge alynǵan.
