«Habar» arnasynyń «Talqy» baǵdarlamasynda eltańbany ózgertýge qatysty pikirtalas boldy.
Aita keteiik, Memleket basshysy Qasym-Jomart Toqaev Ulttyq quryltaidyń úshinshi otyrysyndaǵy sózinde Eltańbamyzǵa qatysty syni pikirler aitylyp jatqanyn jáne ony Keńes zamanyndaǵy Gerbke uqsatyp jatatynyn aitqan.
«Tym eklektikalyq, kúrdeli deidi. Mundai oidy el isine bei-jai qaramaityn belsendi azamattar ǵana emes, mamandar da aityp júr. Oryndy paiymdar eskerýsiz qalmaýy kerek. Ortaq kelisimge kelgen jaǵdaida arnaýly komissiia qurýǵa bolady. Bul komissiia máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baiqaý jariialanady – dedi Toqaev quryltaida.
Baǵdarlama avtorlary kórermender arasynda saýalnama júrgizip jurttan «Eltańba unai ma» dep suraǵan. Nátijesinde 70% «unaidy», 9% «ózgertý kerek», 8% «múldem unamaidy», 13% «ol týraly oilanbadym» dep jaýap bergen.
Baǵdarlamaǵa qonaq bolyp qatysqan QR Parlamenti Májilisiniń depýtaty Erkin Ábil osy másele boiynsha depýtattyq saýal joldaǵanyn aitty.
«Ózgertemiz, álde ózgertpeimiz dep áli sheshim qabyldanǵan joq. Tek qana talqylaýdyń nátijesinde sheshim qabyldanýy kerek. Ekinshiden, negizgi qarsy shyǵyp jatqan kóbi qarjylyq shyǵyn jóninde aitady. Depýtattyq saýalymyzda osyǵan basty nazar aýdardyq, úkimetke ózgertken jaǵdaida qansha qarajat keregin bizge eseptep berý. Aldymen osy máseleni sheship alýymyz kerek», - dedi ol.
Baǵdarlamaǵa QR Mádeniet jáne aqparat ministrligi geraldikalyq zertteýler ortalyǵynyń bas mamany Asyljan Bijanov ta qatysty. Ol Eltańbaǵa osy ýaqytqa deiin neshe ret ózgertýler engizilgenin aitty.
«Eltańbaǵa 1998, 2006, 2008, 2018 jyldary kishigirim ózgerister engizildi. Ol kezde beinesi túbegeili ózgergen joq, detaldarǵa ǵana ózgerister engizildi. Eltańba áý bastan altyn jalatylǵan bolýy kerek bolǵan, qazir biraz qanyq altyn tús boldy», - deidi Asyljan Bijanov.
Baǵdarlama barysynda qazirgi Eltańba men burynǵy Keńes Odaǵyndaǵy eltańba salystyryldy. Erkin Ábil Eltańbada tarihpen bailanystyratyn bir simvol bolýy kerek dep esepteidi.
Baǵdarlama qonaǵy aqyn Juldyz Toibek Eltańbany ózgertýge múldem qarsy ekenin aitty.
«294 úmitkerdiń ishinen jeńip shyqqan bul Eltańbamyz halyqtyń júreginen jol tapty. KSRO men bizdiń Eltańba arasynda aiyrmashylyq óte kóp. Bizdiń Eltańbadaǵy shańyraq – ultymyzdyń shańyraǵy. Osy shańyraqtyń astynda kóptegen ult pen ulystar ómir súrip jatyr», - dedi Juldyz Toibek.
«Jańa adamdar» jastar qozǵalysy Almaty jáne Astana qalalarynda ártúrli jastaǵy 500 adam arasynda saýalnama júrgizip, kópshilikten eltańbany qanshalyqty tanitynyn suraǵan.
Jastar qozǵalysynyń múshesi Almat Qýanyshtyń aitýynsha, saýalnamaǵa qatysqandardyń 70%-y bizdiń eltańbanyń qandai beinede ekenin bilmeitin bolyp shyqqan.
«Eltańbanyń qandai ekenin bilmese, demek Eltańbanyń jetkizgisi kelgen oiyn múldem túsinbeidi degen sóz, iaǵni memlekettik rámiz retinde ol memlekettiń baǵdaryn, aldaǵy maqsattaryn belgileýi kerek. Al ondai qundylyqtardy halqymyz túsinbese jáne sezinbese, demek Eltańba óziniń basty fýnktsiiasyn oryndap turǵan joq degen sóz», - deidi Almat Qýanysh.
