Elordanyń úsh aýdanynda qurbandyq shalatyn oryndar bekitildi, dep habarlaidy QazAqparat.
«Qazirgi tańda qala ákimdigi qurbandyq shalýǵa bolatyn 7 oryndy bekitti. Iaǵni, olardyń bári de tiisti talaptarǵa sai oryndar. Osy 7 núktede qala boiynsha qurbandyq shalý rásimderi ótedi», - dedi Nur-Sultan qalalyq qoǵamdyq damý isteri basqarmasynyń bólim basshysy Ádilet Tóleýtaev elorda ákimdiginiń baspasóz ortalyǵynda.
Onyń aitýyna qaraǵanda, qurbandyq shalýdyń bekitilgen erejelerin eskere otyryp, 5 tamyzdan bastap Áziret Sultan meshitinde qasapshylarǵa arnalǵan oqytý seminarlary ótkizilýde. Imamdar Shariǵat zańy boiynsha, al tiisti mamandar sanitarlyq normalar boiynsha qasapshylardy oqytyp jatyr. Trening 11 tamyzǵa deiin jalǵasady.
«Osy ýaqytqa deiin mal soiatyn 7 orynǵa tekserý jumystary júrgizildi. Sanitarlyq normalar men qaýipsizdik erejelerine sai kelýine tekseris ótkizilip, olardyń mal soiýǵa daiyn ekeni belgili bolyp otyr. Mereke qarsańynda áleýmettik jaǵdaiy tómen otbasylarǵa mal etin taratý jumystary júrgiziledi. Kómekke muqtaj adamdardyń tizimi jasalýda. 11 tamyz kúni kómekke muqtaj otbasylarǵa qurbandyqqa shalynatyn mal eti kúiinde kómek kórsetiledi», - dedi Ádilet Tóleýtaev.
Basqarma ókili óz sózinde qala boiynsha mal baǵasynyń negizsiz kóterilýine jol berilmeitinin aitady. Bul rette ákimdik tarapynan qatań baqylaý qolǵa alynbaq. Osy maqsatta mal bazary basshylyqtary túsindirý jumystaryn júrgizdi. Bekitilmegen oryndarda da maldyń soiylmaýyna erekshe mańyz beriledi.
Nur-Sultandaǵy negizgi qurbandyq shalý oryndary:
Almaty aýdany
«Metro» saýda ortalyǵy, Astana-Qaraǵandy tas joly.
Baiqońyr aýdany
«Nurbereke-555» JShS, Alash tasjoly 30, Rýbikom bazary men Ámire saýda úiiniń ortasy;
«Shaýshen» sharýa qojalyǵy, Astana-Pavlodar tasjolynyń 9-shy shaqyrymy;
«Temesh» sharýa qojalyǵy, Astana-Sofievka tasjolynyń 7-shaqyrymy;
Esjanov jeke kásibi, «Jailaý», Alash tasjoly, Ts 313 kóshesi;
Saryarqa aýdany
«Uljan» ámbebap bazary (burynǵy Saianur).
Esil aýdany
«Altyn-Taǵa» bazary Qosshy aýylynyń aldy.
Aita ketsek, Oraza ait meiramynan 70 kún ótkennen keiin bastalatyn Qurbai ait ta jaqyndap keledi. Osyǵan orai, Qazaqstan musylmandary dini basqarmasy Qurbandyq shalý barysynda oryndalýy tiis talaptardy ataǵan bolatyn. Biyl merekeniń alǵashqy kúni 11 tamyzǵa sáikes keledi.
