Qoiandyda ne joq?
Qoiandyda 30 myńdai halyq turady eken. Shaǵyn bir qalashyq. Az adam emes. Biraq, resmi tirkeýde 4-5 myńdai ǵana turǵyn bar. Qalǵany qalada, anda-mynda...
Óitkeni, kóp úilerde qujat joq, taǵy basqa... Sonyń kesirinen Qoiandy kóp múmkindikterden qaǵylyp keledi. Sý joq, toq joq, jol joq, mektep joq, emhana joq...
Múlde joq dep te aita almaisyz, biraq ortalyq kóshede ǵana asfalt jol bar. Toq pen sý da ortalyq jaqta. Jalǵyz mekbeti bar. Úsh aýysymda oqidy. Biraz balalar qalaǵa qatynaidy. Byltyr birinshi klasqa 400-den astam bala barypty. Olar 17 synyp bolǵan.
Jerdi de anaý bir, mynaý bir satqan. Alǵan halyqta ne jazyq bar. Úiin salyp, tyrbanyp tirlik etip jatyr. Biraq, joba-jospar joq, kóp jeri bei-bereket ornalasqan. Qys bolsa qar astynda, kóktem men jańbyrda batpaq keshken el. Sýdy tasyp iship, qazǵan qudyǵynan alyp otyr. Toq ta jekelerdiń tarifymen. Keibir úilerde joq...
Qarap otyrsań, Astananyń shetindegi ǵana úlken eldimeken. Shetten kelgen qandastar ǵana emes, Qazaqstannyń ár óńirinen qonystanǵan qazaqtar da kóp. Árine, Astanaǵa jap-jaqyn, biraq oǵan qaramaidy. Aýdan ortalyǵy Aqmoldan júz shaqyrymdai alys. Jan sany kóp, ózimen-ózi jatyr. Qiyndyǵy kóp. Eń bolmaǵanda jolǵa tas bolsa da tógip, taǵy birer mektep salyp berse. Turǵyndarynyń deni qalada jumys isteidi. «Elordasy» dep sonyń ainalasynan tirshilik kózin izdep kelgen halyq. Eshkimge mindetsip otyrǵan joq, árkim óz shamasynsha kásip jasap, eńbek etýde.
Jerdi satyp, úi salýǵa, halyqtyń qonysanýyna múmkindik bergen úkimet endi olarǵa az da bolsa moiyn buryp, jol, sýyn, toǵyn rettesýge nege umtylmaidy dep oilaisyń? Damyp jatyrmyz, gúldenip jatyrmyz deimiz. Sengiń keledi, biraq shoǵyrly halyq ornalasqan, Astana irgesindegi úlken kenttiń mynadai jutaǵan jaǵdaiyn kórip basqasha oilaisyń...
Múmkin, Aqmola oblysy, úkimet jospar quryp otyrǵan bolar. Ózbekstan prezidenti Shavhat aka bir aýyldy 40 kúnde qaita sala saldy ǵoi. Bizdiń biliktegi myqtylar da Qoiandyny bir-aq kúnde jańǵyrtýdy josparlap qoiǵan shyǵar, biyl-aq... Astananyń jiryrma jyldyǵy toiyna 19 milliard teńge bólgende, baqadai shýlaǵan halyq otyrǵan, sol Astanaǵa tiip turǵan qordaly aýyldy jónge salý qiyn deisiz be...
Murat Almasbek
