ەلوردانىڭ ٸرگەسٸندەگٸ اۋىلعا قاشان كٶڭٸل بٶلٸنەدٸ?

مٷلدە جوق دەپ تە ايتا المايسىز, بٸراق ورتالىق كٶشەدە عانا اسفالت جول بار. توق پەن سۋ دا ورتالىق جاقتا. جالعىز مەكبەتٸ بار. ٷش اۋىسىمدا وقيدى. بٸراز بالالار قالاعا قاتىنايدى. بىلتىر بٸرٸنشٸ كلاسقا 400-دەن استام بالا بارىپتى. ولار 17 سىنىپ بولعان.

جەردٸ دە اناۋ بٸر, مىناۋ بٸر ساتقان. العان حالىقتا نە جازىق بار. ٷيٸن سالىپ, تىربانىپ تٸرلٸك ەتٸپ جاتىر. بٸراق, جوبا-جوسپار جوق, كٶپ جەرٸ بەي-بەرەكەت ورنالاسقان. قىس بولسا قار استىندا, كٶكتەم مەن جاڭبىردا باتپاق كەشكەن ەل. سۋدى تاسىپ ٸشٸپ, قازعان قۇدىعىنان الىپ وتىر. توق تا جەكەلەردٸڭ تاريفىمەن. كەيبٸر ٷيلەردە جوق...

قاراپ وتىرساڭ, استانانىڭ شەتٸندەگٸ عانا ٷلكەن ەلدٸمەكەن. شەتتەن كەلگەن قانداستار عانا ەمەس, قازاقستاننىڭ ەر ٶڭٸرٸنەن قونىستانعان قازاقتار دا كٶپ. ەرينە, استاناعا جاپ-جاقىن, بٸراق وعان قارامايدى. اۋدان ورتالىعى اقمولدان جٷز شاقىرىمداي الىس. جان سانى كٶپ, ٶزٸمەن-ٶزٸ جاتىر. قيىندىعى كٶپ. ەڭ بولماعاندا جولعا تاس بولسا دا تٶگٸپ, تاعى بٸرەر مەكتەپ سالىپ بەرسە. تۇرعىندارىنىڭ دەنٸ قالادا جۇمىس ٸستەيدٸ. «ەلورداسى» دەپ سونىڭ اينالاسىنان تٸرشٸلٸك كٶزٸن ٸزدەپ كەلگەن حالىق. ەشكٸمگە مٸندەتسٸپ وتىرعان جوق, ەركٸم ٶز شاماسىنشا كەسٸپ جاساپ, ەڭبەك ەتۋدە.

جەردٸ ساتىپ, ٷي سالۋعا, حالىقتىڭ قونىسانۋىنا مٷمكٸندٸك بەرگەن ٷكٸمەت ەندٸ ولارعا از دا بولسا مويىن بۇرىپ, جول, سۋىن, توعىن رەتتەسۋگە نەگە ۇمتىلمايدى دەپ ويلايسىڭ? دامىپ جاتىرمىز, گٷلدەنٸپ جاتىرمىز دەيمٸز. سەنگٸڭ كەلەدٸ, بٸراق شوعىرلى حالىق ورنالاسقان, استانا ٸرگەسٸندەگٸ ٷلكەن كەنتتٸڭ مىناداي جۇتاعان جاعدايىن كٶرٸپ باسقاشا ويلايسىڭ...

مٷمكٸن, اقمولا وبلىسى, ٷكٸمەت جوسپار قۇرىپ وتىرعان بولار. ٶزبەكستان پرەزيدەنتٸ شاۆحات اكا بٸر اۋىلدى 40 كٷندە قايتا سالا سالدى عوي. بٸزدٸڭ بيلٸكتەگٸ مىقتىلار دا قوياندىنى بٸر-اق كٷندە جاڭعىرتۋدى جوسپارلاپ قويعان شىعار, بيىل-اق... استانانىڭ جيرىرما جىلدىعى تويىنا 19 ميلليارد تەڭگە بٶلگەندە, باقاداي شۋلاعان حالىق وتىرعان, سول استاناعا تيٸپ تۇرعان قوردالى اۋىلدى جٶنگە سالۋ قيىن دەيسٸز بە...