Nur-Sultan qalasynyń bas memlekettik sanitarlyq dárigeri Sarhat Beisenova halyqty karantin sharalaryn saqtaýǵa jáne indetke qarsy vaktsina alýǵa shaqyrdy, dep habarlaidy QazAqparat.
«Qurmetti elorda turǵyndary men qonaqtary! Qaladaǵy epidemiologiialyq jaǵdai turaqsyz bolyp qalýda. Osyǵan bailanysty qala turǵyndaryna, ásirese úi karantinindegi adamdarǵa, sondai-aq kásipkerlik sýbektilerine aitarym, barlyq shekteý sharalary men sanitarlyq erejelerdi saqtańyzdar, bul infektsiianyń taralýyn tómendetýge jáne aýrý qaýpin azaitýǵa múmkindik beredi», - dedi S. Beisenova elorda ákimdiginde ótken brifingide.
Sonymen birge, elordada halyqty COVID-19-ǵa qarsy vaktsinalaý boiynsha jappai naýqan júrgizilip jatyr. Elordanyń árbir turǵyny, qasietti Ramazan aiynda oraza ustap, aýyz bekitkenderdiń de COVID-19-ǵa qarsy ekpe alýǵa jáne ózin indetten qorǵaýǵa múmkindigi bar, ol úshin ekpe pýnktteri saǵat 24.00-ge deiin jumys isteidi.
«Buryn habarlanǵandai, COVID-19-ǵa qarsy vaktsinany qabyldaý orazany buzbaidy, eger belgili bir zattyń as qorytý júiesine aýyz, muryn siiaqty tabiǵi sańylaýlar arqyly ense, oraza buzylady. Al inektsiialar kezinde jáne koronavirýsqa qarsy vaktsinany egý atalǵan jaǵdailarǵa jatpaidy. Bul ujymdyq immýnitetti damytýǵa múmkindik beredi, ádettegi ómir saltyna oralýǵa kómektesedi. Elordanyń barlyq turǵyny qaladaǵy jáne jalpy Qazaqstan Respýblikasyndaǵy KVI jaǵdaiynyń aýyrlyǵyn sezinýi tiis.
Men árbir turǵyndy qamqorlyq tanytyp jáne oraza ustaǵan týystaryn COVID-19 juqtyrýdan qorǵaýdy suraimyn, ol úshin bárine belgili saqtyq sharalaryn saqtaý kerek, atap aitqanda: qoǵamdyq oryndarda maska taǵý, áleýmettik qashyqtyqty saqtaý, buqaralyq is-sharalardy uiymdastyrmaý jáne qatyspaý», - dedi elordanyń bas memlekettik sanitarlyq dárigeri.
