Elordanyń bas sanitarlyq dárigeri Janna Pirálieva qaladaǵy qoǵamdyq kóliktiń jumys rejimine engizilgen ózgeristerdi túsindirdi, dep habarlaidy "Ult aqparat".
«Biylǵy 25 jeltoqsandaǵy jaǵdaiy boiynsha qalada 17 972 (+60) COVID-19 jaǵdailary tirkelgen, onyń ishinde 16 465 naýqas (92%) saýyǵyp shyqty. 1151-i statsionarlyq jáne ambýlatoriialyq em-dom alyp jatyr. 356 ólim jaǵdaiy (1,9%) tirkeldi», - dedi Janna Pirálieva.
Onyń aitýynsha, kyrkúiek pen qazan aiynyń alǵashqy on kúninde qaladaǵy epidemiologiialyq ahýal turaqty dep baǵalandy, biraq qazan aiynyń ekinshi jartysynan bastap reprodýktivti san 1-den asty, sondyqtan qala «sary aimaqqa» ótti.
«Qala 10 jeltoqsanǵa deiin «sary aimaqta» boldy, ári qarai «qyzyl aimaqqa» aýysyp bir apta turdy. Qaladaǵy júrgizilip jatqan shekteý jáne karantindik sharalar nátijesinde indet juqtyrýdyń tómendeýi baiqaldy. Nátijesinde, qala «jasyl aimaqqa» aýysyp, ári qarai 22 jeltoqsannan «sary aimaqqa» kóshti. Qazirgi kezde qala «sary aimaqta» tur», - dedi bas sanitarlyq dáriger.
Onyń sózine qaraǵanda, joǵaryda aitylǵandardy, sondai-aq sońǵy 2 aptada infektsiialyq aýrýhanalardyń júktemesin jáne turǵyndardyń indetke qatysty meditsinalyq kómekke júginýi boiynsha birshama oń tendentsiiany eskere otyryp, qaladaǵy keibir jekelegen qyzmet túrleriniń jumys rejimderin qaita qaraý týraly sheshim qabyldandy.
Osy oraida qoǵamdyq kólik jumysyna qarbalas saǵattarda avtobýstar sanynyń artýymen sońǵy aialdamada dezinfektsiialyq quraldarmen salonda tazalyq jumystaryn júrgizý eskerilgen. Sonymen qatar avtobýstyń barlyq esikterin ashý, jolaýshylar úshin sanitaizer ornatý, áleýmettik araqashyqtyqty mindetti túrde saqtaý, maska taǵý rejimin oryndaý talaptary qoiylǵan. Jumys, demalys ári mereke kúnderi saǵat 6:00-dan 23:00-ge deiin jumys kestesi belgilendi.
