Elordada «Nur Otan» partiiasynyń partiiaishilik praimerizine qatysýshylar arasynda kezekti pikirsaiys ótti. Olar debat barysynda ózderiniń sailaýaldy baǵdarlamalary týraly aityp, tikelei efirde qoiylǵan birqatar suraqtarǵa jaýap berdi. Úmitkerler sondai-aq elordany damytýdyń naqty sharalaryn usyndy.
Debatty «Nur Otan» partiiasy astanalyq filialynyń tóraǵasy, Nur-Sultan qalasynyń ákimi Altai Kólginov kirispe sózimen ashty. Ol óz kezeginde Esil aimaǵynda praimerizge 167 adam qatysyp jatqanyn jáne olardyń 43 paiyzy jastardyń múddesin qorǵaitynyn aitty.
– Nur-Sultan qalasynda partiia músheleri ózderin belsendi túrde kórsetip jatyr. 51 myń partiia múshesiniń 4,3 myńy praimerizge qatysýǵa ótinish bildirdi, bul eldegi eń kóp ótinish, – dedi ákim.
Pikirsaiystar barysynda elorda turǵyndaryn tolǵandyratyn ózekti máseleler kóterildi. Atap aitqanda, bilim berý salasyn damytý, qazaq tiliniń mártebesin kóterý, qoǵamdyq qaýipsizdik máseleleri, sybailas jemqorlyqqa qarsy is-qimyl jáne taǵy da basqa ózekti máseleler tilge tiek etildi.
Pikirsaiysqa qatysýshylardyń biri bilim berý úrdisindegi barlyq jaqsartýlar muǵalimderdi qoldaý arqyly júzege asatynyn, meditsina salasyn jaqsartý úshin dárigerlerdi áleýmettik qoldaý kerek ekenin, atalmysh mamandardyń jalaqylaryn kóterýdiń mańyzdylyǵyn, sondai-aq, olardy turǵyn úimen qamtamasyz etý kerek ekenin atap ótti.
Kelesi bir qatysýshy qoǵamdyq bastamalar portalyn qurýdyń mańyzdy ekenin sóz etti. Ol sonymen qatar ákimshilik jáne saiasi memlekettik qyzmetshilerge qoiylatyn biliktilik talaptaryn kóterýdi, sondai-aq jeke sektordyń bilikti ókilderi tartylýy úshin memlekettik qyzmetkerlerdiń jalaqysy joǵary bolýy kerek ekenin jetkizdi.
Ózekti máselelerdiń birin praimerizge qatysýshy Saltanat Qapesova aitty. Ol jas urpaqty dástúrli qundylyqtar negizinde tárbieleýdiń artyqshylyqtary týraly baiandady.
– Bizdiń balalarymyz qazir qatygezdik jii kórsetiletin ashyq aqparattyq ortada ómir súrip keledi. Nátijesinde, bul balanyń jeke damýyna da, jalpy qoǵamǵa da áserin etedi. Sondyqtan, tujyrymdamany ázirleý, barlyq aimaqtardaǵy erkin úiirmeler men sektsiialar sanyn kóbeitý, balalardyń rýhani-adamgershilik tárbiesine baǵyttalǵan animatsiialyq baǵdarlamalar men kórkem baǵdarlamalar óndirisin ulǵaitý mańyzdy dep sanaimyn. JOO men mektepterde media bilim berý sabaqtaryn engizý mańyzdy, – dedi Saltanat Qapesova.
Pikirsaiysqa qatysýshylar basqosý kezinde ekologiialyq bastamalar úshin jastar ortalyqtaryn qurýdyń, shyǵarmashylyq mamandyqtaryndaǵy adamdardyń mártebesin kóterýdiń mańyzdylyǵyn jan-jaqty talqylady.
