Q.Qýanyshbaev atyndaǵy memlekettik akademiialyq qazaq mýzykalyq drama teatrynda erkin shyǵarmashylyqqa arnalǵan «QALLEKI» laboratoriiasy ashyldy, dep habarlaidy "Ult aqparat".
Zerthana shymyldyǵy teatrdyń jas akteri Bázil Sultanǵazy rejisserlik etken Oralhan Bókeidiń «Uiqym kelmeidi» dramasymen saltanatty túrde ashyldy.
Laboratoriianyń maqsaty – shyǵarmashyl jandar úshin bailanys ortasyn qurý jáne ónerge ózgeshe kózqaras jasap, tyń dúnielerdi sahnalaý. Sondai-aq, sheteldik mamandarmen sheberlik sabaqtaryn uiymdastyrý, jazýshy-dramatýrgtermen kezdesý, pesa talqylaý, jańa rejisserlermen bailanys ornatý syndy kóptegen shara josparlanǵan.
«Osy teatrǵa basshylyqqa kelgende jańa ǵimaratty araladym. Sonda osy zaldy kórip, kóz aldyma spektakl oinaǵany elestedi. Sodan keiin Bázildiń ózi balalardy jinap alyp, jańa qoiylymdarǵa daiyndalyp júr eken. «Bolam degen balanyń betine qaqpa, belin bý» deidi. Sol jastarǵa múmkindik berý úshin eksperimentaldy zerthana ashyp jatyrmyz. Bul ǵimarattaǵy negizgi eki zalymyzdan keiingi úshinshi sahna bolyp otyr. Árine, mundai jobalar jer-jerde ashylyp jatyr. Biraq úlken memlekettik teatr ishinen laboratoriia birinshi ret qolǵa alynýda. Muny kópfýnktsiialy zal dep ataýǵa bolady. Qalai erkińe baǵyndyryp, qandai formatta qoiylym qoiýdy óziń sheshesiń», - dedi Teatrdyń kórkemdik jetekshisi, qazaqstannyń eńbek sińirgen qairatkeri Qýandyq Qystyqbai jýrnalisterge arnalǵan baspasóz konferentsiiasynda.
Taǵy bir ereksheligi, Qalleki laboratoriiasy – elordalyqtarǵa arnalǵan alǵashqy keshki teatr. Bul da jastardyń keshki ýaqytyn teatrda ótkizýi úshin jasalǵan áreket. Munda tek qoiylymdar ǵana emes, dramatýrgterdiń pesalaryn talqylaý, aqyndar keshi, avtorlyq ánder keshi syndy túrli sharalardy ótkizýge bolady. Biletteri onlain satylady.
«Qoǵamdyq oryndarda óz zamandastarymmen sóileskende, «Teatrǵa nege kelmeisiń?» degen suraqqa «Maǵan qyzyq emes» degen jaýaptar estitinmin. Sondyqtan, búgingi qoiylymda da óz zamandastarymyzdyń problemasyn qozǵaýǵa tyrystyq. Spektaklde 9 akter oinaidy. Barlyǵy – Qalleki teatrynyń jastary. Onda alǵashqy mahabbat, adam boiyndaǵy sezimder týraly aitylady», - deidi akter, rejisser Bázil Sultanǵazy.
