Qaladaǵy barlyq taksi parkterinde Covid-19 infektsiiasyn juqtyrmaý úshin qatań saqtyq sharalary saqtalǵan, dep habarlaidy "Ult aqparat" Nur-Sultan qalasy ákimdiginiń resmi saityna silteme jasap.
Elordalyq jolaýshylar qaýymdastyǵynyń atqarýshy direktory Sáken Hanhojinniń aitýynsha, taksi júrgizýshileri betperde men qolǵap kiip, kólik salony ár jolaýshydan keiin antiseptikpen óńdeledi. Kólikter arnaiy bazada kúnine eki ret kólik jýatyn tehnikamen tazartylady.
«Bizde barlyǵy 14 avtopark bar. Bul avtoparkter sanitarlyq tazartý júrgiziletin úsh pýnktke bólingen. Kún saiyn kólikter eki ret tazalaýdan ótedi. Birinshi kezeń 06:00-den 09:00-ge deiin, al ekinshi kezeń 14:00-den 17:00-ge deiin jalǵasady», – dep túsindirdi S.Hanhojin.
Sondai-aq ol tólem kóp jaǵdaida bank aýdarymy arqyly júzege asatynyn tilge tiek etti. Júrgizýshiler kún saiyn aýysym aldynda tekseristen ótedi. Tekseris barysynda taksi júrgizýshisiniń temperatýrasyna erekshe nazar aýdarylady. Avtoparkterdegi júrgizýshilerge barlyq qorǵanys quraldary (maskalar, antiseptikter, qolǵaptar) beriledi.
«Biz qorǵanys quraldaryn kóterme baǵada satyp alýdy uiymdastyrýǵa tyrysamyz, sodan keiin olardy parkterge taratamyz. Sońǵy ret atalǵan quraldardy mamyr aiynyń basynda satyp aldyq, qazir barlyq júrgizýshiler qajetti qorǵanys quraldarymen qamtamasyz etilgen», – dep túiindedi S.Hanhojin.
