قالاداعى بارلىق تاكسي پاركتەرٸندە Covid-19 ينفەكتسيياسىن جۇقتىرماۋ ٷشٸن قاتاڭ ساقتىق شارالارى ساقتالعان, دەپ حابارلايدى "ۇلت اقپارات" نۇر-سۇلتان قالاسى ەكٸمدٸگٸنٸڭ رەسمي سايتىنا سٸلتەمە جاساپ.
ەلوردالىق جولاۋشىلار قاۋىمداستىعىنىڭ اتقارۋشى ديرەكتورى سەكەن حانحوجيننٸڭ ايتۋىنشا, تاكسي جٷرگٸزۋشٸلەرٸ بەتپەردە مەن قولعاپ كيٸپ, كٶلٸك سالونى ەر جولاۋشىدان كەيٸن انتيسەپتيكپەن ٶڭدەلەدٸ. كٶلٸكتەر ارنايى بازادا كٷنٸنە ەكٸ رەت كٶلٸك جۋاتىن تەحنيكامەن تازارتىلادى.
«بٸزدە بارلىعى 14 اۆتوپارك بار. بۇل اۆتوپاركتەر سانيتارلىق تازارتۋ جٷرگٸزٸلەتٸن ٷش پۋنكتكە بٶلٸنگەن. كٷن سايىن كٶلٸكتەر ەكٸ رەت تازالاۋدان ٶتەدٸ. بٸرٸنشٸ كەزەڭ 06:00-دەن 09:00-گە دەيٸن, ال ەكٸنشٸ كەزەڭ 14:00-دەن 17:00-گە دەيٸن جالعاسادى», – دەپ تٷسٸندٸردٸ س.حانحوجين.
سونداي-اق ول تٶلەم كٶپ جاعدايدا بانك اۋدارىمى ارقىلى جٷزەگە اساتىنىن تٸلگە تيەك ەتتٸ. جٷرگٸزۋشٸلەر كٷن سايىن اۋىسىم الدىندا تەكسەرٸستەن ٶتەدٸ. تەكسەرٸس بارىسىندا تاكسي جٷرگٸزۋشٸسٸنٸڭ تەمپەراتۋراسىنا ەرەكشە نازار اۋدارىلادى. اۆتوپاركتەردەگٸ جٷرگٸزۋشٸلەرگە بارلىق قورعانىس قۇرالدارى (ماسكالار, انتيسەپتيكتەر, قولعاپتار) بەرٸلەدٸ.
«بٸز قورعانىس قۇرالدارىن كٶتەرمە باعادا ساتىپ الۋدى ۇيىمداستىرۋعا تىرىسامىز, سودان كەيٸن ولاردى پاركتەرگە تاراتامىز. سوڭعى رەت اتالعان قۇرالداردى مامىر ايىنىڭ باسىندا ساتىپ الدىق, قازٸر بارلىق جٷرگٸزۋشٸلەر قاجەتتٸ قورعانىس قۇرالدارىمەن قامتاماسىز ەتٸلگەن», – دەپ تٷيٸندەدٸ س.حانحوجين.
