Nur-Sultan qalasynyń politsiiasyna eki aidyń ishinde internet-alaiaqtyq faktileri boiynsha eki ótinish kelip túsken, dep habarlaidy "Ult aqparat" elordalyq politsiia departamentine silteme jasap.
Jábirlenýshilerdiń túsindirýinshe, olar Facebook, Mail.ru áleýmettik jelilerinde sheteldik azamattarmen tanysyp, birneshe ai boiy romantikalyq hat jazysqan. Áielderdiń senimine ábden kirip alǵan alaiaqtar bitimgerlik missiia jasaimyz degen syltaýmen aýdio nemese beinebailanysqa shyqpai, tek tólqujat kóshirmesin jibergen.
Hat almasý kezinde ańǵal boijetkender er adamdardyń Qazaqstanǵa kelip, olardy basqa elge alyp ketetine senip, «jigitterine» úlken somada aqsha jibergen.
«Turmysqa shyǵýdy usynǵan alaiaqtar boijetkenderden memlekettik baj tóleý, tólqujatty jańartý, vizaǵa tapsyrys berý siiaqty máselelerdi sheshý úshin qajetti soma jiberýdi suraǵan. Er adamdardyń izgi nietine sengen jábirlenýshiler halyqaralyq aqsha aýdarý qyzmeti arqyly suraǵan somalaryn jiberip otyrǵan. Aqshany qolǵa túsirgen kúdiktiler jeliden shyǵyp ketip, odan keiin bailanysqa shyqpaǵan. Shyǵyn somasy bir oqiǵada - 13 mln teńgeni, ekinshi oqiǵada – 6 mln teńgeni qurady», - dep habarlady baspasóz qyzmetinen.
Atalǵan faktiler negizinde QR Qylmystyq kodeksiniń 190-baby boiynsha qylmystyq is qozǵaldy. Oqiǵaǵa qatysy bar tulǵalardy anyqtaý boiynsha jedel-izdeý sharalary júrgizilýde.
