Elordada «Miras» qorynyń prezidenti Júzbai Serikuly Eńbek jáne halyqty áleýmettik qorǵaý ministri Birjan Nurymbetovtiń qabyldaýynda bolyp, oǵan Zaǵiptar úiiniń jobasyn tanystyrdy, dep habarlaidy QazAqparat.
Júzbai Serikuly ministrmen kezdesý úshin búgin «Nur Otan» partiiasynyń respýblikalyq qoǵamdyq qabyldaýyna kelip, osyndai másele kóterdi. Aitýynsha, elimizdegi zaǵip jandardyń muqtajdyǵy barshylyq.
«Meniń ózim I toptyń múgedegi bolǵannan keiin múgedek jandardyń jaǵdaiyna basa mán beremin. Qoǵamda ártúrli jaǵdai bolyp jatyr. Máselen, kóz janarynan aiyrylǵan jandar kómekke óte muqtaj. Kózine ota jasalyp, jalǵyz qalǵan qanshama adamdy kórdim. Osyndai qiyndyqtarǵa tózbei óz-ózine qol jumsai jazdaǵan adamdar da bar. Olardy sabyrǵa shaqyryp, «eger Alla násip etip, kózimde kishkene sańylaý ashylsa, Zaǵiptar úiin salýǵa áreket jasaimyn» dep ýáde berdim. Sol áreketimizdiń ońynan sheshilip turǵan jaiy bar. Maqsatymyz – jer alyp, ǵimarat salý. Búkil Qazaqstannyń jer-jerinde kóz janarynan aiyrylyp, jalǵyz qalǵan jandar sol jerde tursa deimin», - dedi Júzbai Serikuly.
Qor direktorynyń aitýyna qaraǵanda, elimizde Qarttar úii, Múgedekter jáne Balalar úiiniń bary belgili. Biraq, kóz janarynan aiyrylǵan adamdarǵa arnalǵan úi joq.
«Zaǵip jandar qinalǵanda qaida bararyn bilmei qalady. Álbette, eshkimdi eshkimmen salystyrǵym kelmeidi. Jobanyń qurylymyn jasap qoidyq. Ol ǵimaratty salsaq, onyń ishinde óziniń basseini, jattyǵý zaly, oftalmologiiasy bolady. Ol jerde kásibi jumysymen de ainalysýǵa múmkindik qarastyrsaq deimiz», - dedi ol.
Júzbai Serikulynyń esebinshe, Zaǵiptar úiin salýǵa shamamen 5 mln AQSh dollaryndai qarajat kerek. Ǵimarat úshin qor basshysy 2 gektar aýmaqtyń qajettigin aitady.
«Árine, jumyla kótergen júk jeńil deidi. Sol úshin búgin ministrdiń aldynda birigip investorlar men demeýshilerdi tartý máselesin kóterdim. Sol jaǵynan qoldaý taýyp, oiymyz iske asyp ketse deimiz. 13 qarasha – Dúniejúzilik zaǵiptar kúni. Sonyń qarsańynda elordadaǵy «Turan» meiramhanasynda «Qarańǵydaǵy keshki as» atty qaiyrymdylyq is-sharasyn ótkizeiik dep jatyrmyz. Sol keshke qaladaǵy beldi kásipkerlerdi, depýtattardy shaqyryp, atalmysh máseleni kótermekpiz. Onda múmkindigi shekteýli azamattar da bolady. Sol jerde jobamyzdy tanystyryp, kelýshilerge qarańǵyda keshki asyn ishkizbekpiz. Dárigerlerdiń ózi qarańǵyda tamaqtanýdyń densaýlyqqa paidaly ekenin dáleldegen. Sonymen birge, qarańǵyda zaǵip jandarmen birge ómirdiń qandai bolatynyn sezinip kórse eken degen niet te bar», - dedi ol.
Júzbai Serikuly keltirgen málimetke sensek, Qazaqstanda qazirgi tańda 25 myń zaǵip jan bar. Al Nur-Sultanda kóz janarynan aiyrylǵan I jáne II toptaǵy 600 adam bar.
