Táýelsizdik merekesine orai elorda turǵyndary men qonaqtary úshin erekshe tartý usynyldy. «Qazaqkontsert» memlekettik kontserttik uiymy Nursultan Nazarbaev halyqaralyq áýejaiymen jáne «Qazaqstan temir joly» Ulttyq kompaniiasymen birlesip, merekelik is-sharalar keshenin uiymdastyrdy, dep habarlaidy "Ult aqparat".
Merekelik is-shara Nursultan Nazarbaev halyqaralyq áýejaiynan bastaý aldy. «Qazaqkontsert» uiymynyń «Astana miýzikl» teatry qala turǵyndary men qonaqtaryn mýzykalyq qoiylymmen qýantty. Teatrdyń talantty jastary uly Abaidyń «Aittym sálem, Qalamqas» ánin, «Kerim-aý aidai» atty belgili halyq ánin de shyrqady.
Táýelsizdik merekesine arnalǵan joba «Nurly jol» vokzalynda óz jalǵasyn tapty. «Astana miýzikl» ártisteri bul jerde barshaǵa tanymal «Atameken» ánin oryndap, kópshiliktiń yqylasyna bólendi. Temirjolshylardyń formasyn kiip mýzykalyq fleshmob bastaǵan ártister kórermenderdi tańǵaldyryp, erekshe áser qaldyrdy. Jolaýshylar da ánge qosylyp, patriottyq sezimge bólendi.
Táýelsizdik meiramyn ulyqtaǵan joba barshaǵa merekelik kóńil-kúi syilap, elordalyqtardyń patriottyq rýhtaryn kóterdi. Sondai-aq «Qazaqkontsert» uiymy uiymdastyrǵan bul jobanyń áleýmettik mańyzy da zor. Qoǵamdyq oryndarda ótken osy erekshe quttyqtaýlar arqyly ártister mýzykalyq ónerdi barsha halyqqa qoljetimdi ete bildi.
