Elordada 60 jastaǵy qala turǵyny alaiaqqa jem bolyp, 5 mln teńgeden astam qarajatynan aiyrylyp qaldy, dep habarlaidy QazAqparat.
«Politsiiaǵa qala turǵyny shaǵymdanyp, telefon arqyly bank qyzmetkerimin dep habarlasqan beitanys adamnyń aldaý arqyly 5 mln 250 teńge aqsha qarajatyn alyp qoiǵandyǵyna aryz túsirdi. Esil aýdandyq PB kriminaldyq politsiia qyzmetkerleriniń jedel izdestirý is-sharasy barysynda Almaty qalasynda alaiaqtyq jasaý kúdigimen 31 jastaǵy jigit ustaldy», - dep atap ótedi Nur-Sultan qalalyq politsiia departamentinen.
Qazirgi ýaqytta politsiia qyzmetkerleri qaskúnemniń ózin banktiń qaýipsizdik qyzmeti qyzmetkerimin dep tanystyrǵanyn, zardap shegýshige uialy telefondaǵy qosymshasynan kúdikti operatsiia júrgizilgendigin aityp, sendirgenin anyqtady. Osydan keiin alaiaq zardap shegýshige eski qosymshasyn buǵattap, jańasyn ashýǵa keńes bergen. Áńgimelesý barysynda jigit sypaiylyq tanytyp, áieldiń senimine kirgen. Jańa qosymsha ashylǵannan keiin alaiaq zardap shegýshiniń barlyq aqshasyn KIWI ámiianǵa aýdaryp alǵan.
«Kúdiktiden 10 bank kartasy tárkilendi. Ustalǵan adam Nur-Sultan qalalyq PD ýaqytsha oqshaýlaǵyshyna qamaldy. Atalǵan fakti boiynsha QR QK 190 baby 3 tarmaǵymen sotqa deiingi tergeý júrgizilip jatyr. Qazirgi ýaqytta qylmysqa qatysy bar ózge de adamdardy tabý, alaiaqtardan basqa da zardap shekkenderdi anyqtaý baǵytynda tergeý is-sharalary qolǵa alyndy», - dep atap ótedi departamentten.
