Bas qalada ótken jastar qaiyrymdylyq baly aiasynda 100 otbasyǵa kómek kórsetildi, dep habarlaidy "Ult aqparat".
«Elordada osymen ekinshi jyl ótip jatqan halyqaralyq jastar baly aiasynda 2 qaiyrymdylyq sharasy uiymdastyryldy. Onyń birinshisi «Qaiyrymdy qala» onda halyqaralyq jastar balynyń qatysýshylar 100 áleýmettik jaǵdaiy tómen otbasyǵa materialdyq kómek kórsetti. Ol úshin biz arnaiy muqtaj jandardy tańdap aldyq. Sondai-aq, atalǵan otbasylardyń balalary merekelik shoý-baǵdarlamany tamashalaý múmkindigine ie boldy. Ol Táýelsizdik kúnine orai uiymdastyryldy. Odan bólek, qatysýshylar «Júrekten júrekke» qaiyrymdylyq aktsiiasy aiasynda qaladaǵy qarttar jáne balalar úilerine bardy. Onda qarttar jáne balalarmen áńgime dúken quryp, áserli kesh ótti», - dedi Nur-Sultan qalasy Qoǵamdyq damý isteri basqarmasy jastarmen jumys bóliminiń basshysy Baqytjan Júnisbekov.
Onyń aitýynsha, jastar atalǵan qaiyrymdylyq sharalarǵa belsene qatysty.
«Jastarǵa arnalǵan qaiyrymdylyq baldyń basty maqsaty – kesh ótkizip, bi bileý ǵana emes. Jastardy qaiyrymdylyqqa baýlý, qaiyrymdy is jasaýǵa shaqyrý. Biylǵy jastar baly halyqaralyq deńgeide ótýde. Balǵa qatysýǵa 20-ǵa jýyq elden debiýtanttar ótinim bildirdi. Sonyń nátijesinde 10 túrli eldiń jastaryn qaiyrymdylyq sharasy biriktirdi. Barlyǵy da qaiyrymdylyq sharasynda ultyna, tiline qaramastan óz bilsendilikterin tanytty», - dedi ol.
Aita ketsek, keshe Nur-Sultanda «Bir álem – bir ómir» (One world – one life) atty halyqaralyq jastar baly ótti. Oǵan Resei, Qytai, Nigeriia, Tájikstan, Ózbekstan, Qyrǵyzstan, Ýkraina, Indoneziia, Venesýela jáne óz elimizdiń debiýtanttary qatysty.
