Bas qalaǵa gaz jetkizý jumystary men oǵan qansha qarajat jumsalatyny týraly Nur-Sultan qalasynyń ákimi Altai Kólginov aityp berdi, dep habarlaidy QazAqparat tilshisi.
«Gaz jetkizý qubyrynyń dánekerleý jumysy aiaqtaldy. Endigi jerdegi qala ákimdiginiń mindeti gaz qubyryn qala ishine jetkizý, bul jumys bastalyp ta ketti. Naqty aitqanda, qaladaǵy JEO-1, JEO-2-ge jetkizý úshin barlyǵy 13,5 shaqyrymdyq qubyr qajet, onyń 10 shaqyrymy búginde qazyldy. Iaǵni, elordaǵa gaz berýdiń birinshi kezeńi boiynsha JEO-1, JEO-2-ge gaz keledi. Al qala boiynsha Kóktal-1,2, Agroqalashyq, Ońtústik Shyǵys jáne Internatsional eldi mekenine gaz keledi. Al qalanyń qalǵan bóligine 2 kezeńde jetkiziledi. Elordaǵa gaz jetkizý jalpy quny 45 mlrd teńge qarajatty qajet etip otyr», - dedi A. Kólginov.
Qala basshysynyń aitýynsha, Nur-Sultanǵa gazdyń kelýi birqatar problemalardyń sheshilýine septigin tigizedi.
«Aldymen otyn, kómir jaǵýdyń saldarynan týyndaityn aýa men ekologiianyń lastanýynan arylamyz. Ekinshi másele, gazdandyrýdyń nátijesinde túrli qaldyqtardy tastaý azaiady. Resmi derekterge súiensek, Nur-Sultan qalasynan jyl saiyn 40 myń tonna túrli sanattaǵy qaldyq shyǵarylady. Sondai-aq, turǵyndardan da qala ekologiiasyna qatysty kelip túsetin aryz-shaǵymdar az emes. Kúni keshe ǵana Memleket basshysy elordanyń ekologiiasyna qatysty eskertý jasap, tiisti tapsyrma berdi», - dedi ol.
Buǵan deiin habarlaǵanymyzdai, «Saryarqa» magistrali boiynsha elordada jyl sońyna deiin gaz berile bastaityny belgili boldy.
