Búgin tańerteń elordamyz Nur-Sultanǵa Arys qalasynan 200 bala keldi. Olar endi 10 kún boiy bas shaharda demalatyn bolady, dep habarlaidy Elorda Info.
Bes vagon bolyp kelgen balalardy Nur-Sultan qalasynyń ákimi Altai Kólginov saltanatty jaǵdaida qarsy aldy.
«Nur-Sultan qalasyna qosh keldińizder, balalar! Aman-esen jetkenderińe qýanyshtymyz. Endi sizder osynda on kúndei demalatyn bolasyńdar. Elordamyzdyń kórikti jerlerin aralap, kontserttik-sporttyq sharalarǵa qatysasyzdar. Senderden keiin ózderińmen oqityn basqa balalar da keletin bolady. Nur-Sultan qalasy Aryspen birgemiz!» - dedi elorda ákimi.
Sonymen qatar qala basshysy arystyq búldirshinderge ózimen birge qarsy alý rásimine kelgen Erjan Maksimdi de tanystyrdy.
Arystan kelgen oqýshylar «Balalar úii» men Gýmanitarlyq kolledjde turatyn bolady.
«Bizdi vokzalda qarsy alǵanda qala ákimi «Nur-Sultan qalasyna birinshi ret kelgenderiń bar ma, bolsa qoldaryńdy kóterińdershi» degeninde eki qolymdy birdei kóterip jiberippin. Elordanyń adamdary jaqsy eken, orkestrmen qarsy aldy. Men óte qýanyshtymyn. Endi Arystaǵy úiimiz jóndelgenshe osynda bolamyz. Jatatyn ornymyz da unaidy», - deidi Arys qalasyndaǵy S.Adambekov atyndaǵy orta mekteptiń 6-synyp oqýshysy Merei Naǵanai.
Arys oqýshylaryn bastap kelgen Túrkistan oblystyq Bilim basqarmasynyń mamany Qurmanǵazy Dinaq ta barlyǵy kóńilinen shyqqanyn bildirdi.
«Óte qýanyshtymyz. Balalardy jaqsy qarsy alǵan qala basshylyǵyna, jurtshylyqqa rizashylyǵym sheksiz. Eldigimiz kórinip, birligimiz bilinip jatyr», - deidi ol.
