بٷگٸن تاڭەرتەڭ ەلوردامىز نۇر-سۇلتانعا ارىس قالاسىنان 200 بالا كەلدٸ. ولار ەندٸ 10 كٷن بويى باس شاھاردا دەمالاتىن بولادى, دەپ حابارلايدى ەلوردا ينفو.
بەس ۆاگون بولىپ كەلگەن بالالاردى نۇر-سۇلتان قالاسىنىڭ ەكٸمٸ التاي كٶلگٸنوۆ سالتاناتتى جاعدايدا قارسى الدى.
«نۇر-سۇلتان قالاسىنا قوش كەلدٸڭٸزدەر, بالالار! امان-ەسەن جەتكەندەرٸڭە قۋانىشتىمىز. ەندٸ سٸزدەر وسىندا ون كٷندەي دەمالاتىن بولاسىڭدار. ەلوردامىزدىڭ كٶرٸكتٸ جەرلەرٸن ارالاپ, كونتسەرتتٸك-سپورتتىق شارالارعا قاتىساسىزدار. سەندەردەن كەيٸن ٶزدەرٸڭمەن وقيتىن باسقا بالالار دا كەلەتٸن بولادى. نۇر-سۇلتان قالاسى ارىسپەن بٸرگەمٸز!» - دەدٸ ەلوردا ەكٸمٸ.
سونىمەن قاتار قالا باسشىسى ارىستىق بٷلدٸرشٸندەرگە ٶزٸمەن بٸرگە قارسى الۋ رەسٸمٸنە كەلگەن ەرجان ماكسيمدٸ دە تانىستىردى.
ارىستان كەلگەن وقۋشىلار «بالالار ٷيٸ» مەن گۋمانيتارلىق كوللەدجدە تۇراتىن بولادى.
«بٸزدٸ ۆوكزالدا قارسى العاندا قالا ەكٸمٸ «نۇر-سۇلتان قالاسىنا بٸرٸنشٸ رەت كەلگەندەرٸڭ بار ما, بولسا قولدارىڭدى كٶتەرٸڭدەرشٸ» دەگەنٸندە ەكٸ قولىمدى بٸردەي كٶتەرٸپ جٸبەرٸپپٸن. ەلوردانىڭ ادامدارى جاقسى ەكەن, وركەسترمەن قارسى الدى. مەن ٶتە قۋانىشتىمىن. ەندٸ ارىستاعى ٷيٸمٸز جٶندەلگەنشە وسىندا بولامىز. جاتاتىن ورنىمىز دا ۇنايدى», - دەيدٸ ارىس قالاسىنداعى س.ادامبەكوۆ اتىنداعى ورتا مەكتەپتٸڭ 6-سىنىپ وقۋشىسى مەرەي ناعاناي.
ارىس وقۋشىلارىن باستاپ كەلگەن تٷركٸستان وبلىستىق بٸلٸم باسقارماسىنىڭ مامانى قۇرمانعازى دٸناق تا بارلىعى كٶڭٸلٸنەن شىققانىن بٸلدٸردٸ.
«ٶتە قۋانىشتىمىز. بالالاردى جاقسى قارسى العان قالا باسشىلىعىنا, جۇرتشىلىققا ريزاشىلىعىم شەكسٸز. ەلدٸگٸمٸز كٶرٸنٸپ, بٸرلٸگٸمٸز بٸلٸنٸپ جاتىر», - دەيدٸ ول.
