Elordada dámhanadaǵy gaz ballony jarylysy kezinde zardap shekken 19 adamǵa meditsinalyq kómek kórsetilýde, dep habarlaidy "Ult aqparat".
«Qutqarýshylar 15 ballondy alyp shyǵyp, bir adamdy qutqardy. Aldyn ala málimetterge sáikes, bir adam oqiǵa ornynda kóz jumdy. Sonymen qatar, jedel-meditsinalyq kómek brigadasy 19 adamdy qarap jatyr. 20 sharshy metrdi sharpyǵan órt saǵat 12:58-de sóndirildi», - delingen Nur-Sultan qalalyq tótenshe jaǵdailar departamenti taratqan aqparatta.
Oqiǵa ornynda Nur-Sultan qalalyq TJD, Apattar meditsinasy ortalyǵynyń 34 qutqarýshysy jáne 10 birlik tehnika jumyldyryldy. Adamdar tońyp qalmas úshin qala ákimdigi jáne TJ departamenti KÝNG-kóligi men avtobýs jiberdi. Oqiǵa ornynda jedel shtab quryldy. Psihologiialyq kómek berý jáne aqparattyq qoldaý úshin jedel jeli telefony qosyldy: 24-51-71, 24-51-47.
