Nur-Sultan qalasy ákimdigi elordadaǵy jantúrshigerlik kólik apatynan qansha adam zardap shekkenin málim etti, dep habarlaidy QazAqparat tilshisi.
«Sońǵy málimetter boiynsha 27 adam zardap shekti. Apat saldarynan eki adam kóz jumdy, iaǵni 53 jastaǵy avtobýs júrgizýshisi men 26 jastaǵy avtobýs jolaýshysy. 25 adam kópbeiindi № 2 aýrýhanaǵa jetkizildi. Sonyń arasynda tórteýiniń jaǵdaiy aýyr. 3 adamǵa operatsiia jasalýda, taǵy úsheýi qarqyndy terapiia bóliminde», - dedi qala ákimdiginiń baspasóz hatshysy Elvira Júrgenbaeva.
№1 qalalyq aýrýhanaǵa zardap shekken 1 adam jetkizildi (jedel járdem feldsheri). Ol neirohirýrgiia bólimine jatqyzyldy.
Sonymen qatar, Ortalyq jol aýrýhanasyna tizesin zaqymdaǵan bir adam jetkizildi (jedel járdem feldsheri).
Jalpy, oqiǵa ornyna jedel járdemniń 22 brigadasy men Apattar meditsinasy ortalyǵynyń 1 brigadasy jumyldyryldy.
Budan buryn habarlanǵandai, elordada avtobýs apatynan eki adam kóz jumdy.
«Astana LRT» málimeti boiynsha qaza bolǵandardyń biri - birinshi bolyp soqtyǵysqan avtobýs júrgizýshisi.
Kólik apaty boiynsha politsiia tergeý amaldaryn bastady.
«QR Qylmystyq kodeksiniń «Eki nemese odan da kóp adamnyń ólimine alyp kelgen jol júrý erejesin buzý» baby boiynsha sotqa deiingi tergeý amaldary bastalyp ketti. Osy oraida barlyq qajetti saraptamalar taǵaiyndaldy. Atap aitqanda, tehnikalyq, sot-meditsinalyq tekserýler júrgiziledi. Politseiler atalǵan kólik apatynyń barlyq mán-jaiyn anyqtap jatyr», - delingen Politsiia departamentiniń málimetinde.
26 naýryz kúni Uly Dala men Qabanbai batyr dańǵyly qiylysynda úsh avtobýstyń jáne jeńil kólikterdiń qaqtyǵysýymen jol-kólik oqiǵasy oryn aldy. Qala mańy baǵdaryndaǵy № 303 avtobýs № 12 baǵdardaǵy jolaýshylar avtobýsymen soqtyǵysty. Osynyń ekpinimen olar № 53 avtobýsqa jáne jedel járdem kóligine baryp soǵyldy.
