Búgin QR Ulttyq mýzeiinde «Kóne túrki órkenieti» zaly ashyldy, dep habarlaidy QazAqparat.
Ashylý rásimine Ázerbaijan, Túrikmenstan, Qyrǵyzstan, Ózbekstan, Túrkiia elshilikteriniń ókilderi qatysty.
Kórmeni uiymdastyrýdaǵy maqsat – Eýraziianyń dalalyq aýmaǵynda imperiialyq dárejege jetken Kóne túrki órkenietiniń mádeni jáne rýhani muralaryn búgingi túrki halyqtarynyń myzǵymas murasy retinde nasihattaý, saqtaý.
«Búgin biz úshin eleýli oqiǵa. Elbasy - Nursultan Nazarbaevtyń «Uly dalanyń jeti qyry» tarihi eńbegi aiasynda kóne túrki mádenietin damytýǵa kóńil bólingenin bárimiz jaqsy bilemiz. 2-3 jyl ishinde kóp jumys isteldi. Bul kórme - Ulttyq mýzeige, Qazaqstanǵa ǵana emes, túrki halqyna ortaq dúnie», - deidi QR Ulttyq mýzeiiniń direktory Arystanbek Muhamediuly.
«Kóne túrki órkenieti» zaly Uly dala tósinde imperiialyq dárejege jetken ortaǵasyrlyq túrikterdiń materialdyq, rýhani mádeniet qundylyqtaryna arnalǵan. Túrikterdiń resmi tarihy kóp jaǵdaida b.d. VI ǵasyrynan, iaǵni Túrik qaǵanatynyń qurylýynan bastalady. Túrik órkenietiniń altyn besigi Altaidan bastaý alyp Ortalyq Aziianyń dalalyq aimaǵyna, Eýraziianyń soltústigi men batys óńirine qarai keńeie túsken.
Zal ekspozitsiiasy úsh bólikten turady. Alǵashqysy túrikterdiń jazba mádenietine arnalady. Ejelgi túrik rýnikalyq jazýlary avtohtondy mádeniettiń dálme-dál úlgisi. Olar Ortalyq Aziia, Sibir jáne Mońǵoliia men Qazaqstan aýmaqtarynda bolǵan tarihi oqiǵalardy naqty baiandaityn alǵashqy tasqa qashalyp qaldyrylǵan ainymas dálelder.
Kelesi ekspozitsiia tas músinderge arnalady. Ejelgi túrikterdiń mádeni jáne ǵuryptyq keshenderiniń negizgi quramdas bóligi. Ol Eýraziia dalasynyń Uly beldeýindegi túrik halyqtarynyń jerleý men eske alý jáne dini-ideologiialyq qaǵidalarymen tyǵyz bailanysty. Osylaisha ekspozitsiianyń bul bóligi ejelgi túrikterdiń dúnietanymdyq kórsetkishterine negizdelgen.
Zal ekspozitsiiasynyń úshinshi bóligi ortaǵasyrlyq túrik dáýiri eskertkishterinen anyqtalǵan at-ábzelderi men qarý-jaraqtary jáne materialdyq mádeniet kórsetkishteri toptastyrylǵan.
