1 naýryz – Alǵys aitý kúnine orai elordadaǵy «Qazaq eline myń alǵys!» monýmentine gúl shoqtary qoiyldy, dep habarlaidy QazAqparat.
Saltanatty sharaǵa Parlament Májilisiniń depýtattary men Qazaqstan halqy assambleiasynyń músheleri jáne qala turǵyndary qatysty.
«Eń aldymen Alǵys aitý kúninde barlyq azamattarǵa el damýyna úlken úles qosqany úshin úlken alǵys bildiremin! Alǵys aitý – bul bizdiń halqymyzda bólek bir mádeniet. Biz árqashan bir-birimizge alǵys aityp júremiz. Máselen, qazir de qasymyzda kóshelerdi qardan tazartyp júrgen adamdarǵa alǵys aitqym keledi. Búgingi sharaǵa kelgen jýrnalisterge, ulttyq mádeni ortalyqtardyń qyzmetkerlerine, tatýlyq baǵytynda jumys istep júrgen barlyǵyna myń alǵys!», - dedi QR Aqparat jáne qoǵamdyq damý ministri Asqar Ýmarov.
Sonymen birge, Assambleia atynan sailanǵan Májilis depýtaty Saýytbek Abdrahmanov Alǵys aitý kúni osymen jetinshi jyl qatarynan atalyp ótkenin aitty.
«Bul erekshe mándi mereke, kóktemniń alǵashqy kúninde bizdiń Assambleianyń qurylǵan kúnimen tuspa-tus taǵaiyndalǵan edi. Osy memlekettiń etnostarynyń birligin kózdiń qarashyǵyndai saqtaýdy bizge úiretken tulǵanyń taǵaiyndaǵan merekesi. Sondyqtan biz búgingi tańda Qazaqstan etnostaryna ózine jasalǵan jaqsylyqty eselep qaitarǵan halyqtardyń bárine biz de alǵys aitamyz!», - dedi S. Abdrahmanov.
Aita keteiik, 2016 jyldyń 14 qańtardan bastap 1 naýryz – elimizde Alǵys aitý kúni dep jariialanǵan. Bul kún qiyn-qystaý kezeńderde qýanysh pen qaiǵyny qatar bólisip, pana bola bilgen qazaq halqyna ózge ult ókilderiniń alǵys aitatyn sáti. Dál osy kúni 1995 jyly elimizde Qazaqstan halqy Assambleiasy qurylǵan edi.
