Elordada demalys kúni dámhananyń birinde jarylys bolyp, bir adam kóz jumǵan edi. Qalalyq qoǵamdyq densaýlyq saqtaý basqarmasy búgin sol jarylys saldarynan aýyr jaraqat alǵan taǵy bir adamnyń qaitys bolǵanyn rastady, dep habarlaidy "Ult aqparat".
«Naýqas jansaqtaý bóliminde kóz jumdy. Patsient óte aýyr jaǵdaida aýrýhanaǵa túsken. Naýqasta bassúiek miynyń aýyr jaraqaty bolǵan. Aýrýhanaǵa túsken sátten bastap ony № 2 kópbeiindi qalalyq aýrýhana jáne Ulttyq neirohirýrgiia ortalyǵynyń mamandary qarady. Biraq júrgizilgen barlyq emdeý sharalaryna qaramastan naýqasty aman alyp qalý múmkin bolmady», - deidi basqarmanyń baspasóz hatshysy.
Qazir, jarylystan zardap shekken taǵy eki naýqas jansaqtaý bóliminde jatyr.
Aita keteiik, 21 qarashada astanadaǵy dámhananyń birinde gaz ballony jarylyp, 1 adam qaza tapty. Zardap shekken 23 adam aýrýhanalarǵa emdelýge jatqyzyldy. Osy oqiǵadan keiin Nur-Sultan ákimi Altai Kólginov qaza tapqan qyzdyń otbasyna kómek kórsetiletindigin málimdedi. Ol Tótenshe jaǵdailar departamenti men Politsiia departamentine qaladaǵy basqa da qoǵamdyq tamaqtaný nysandarynda órt qaýipsizdigi erejesiniń saqtalýyn tekserýdi tapsyrdy.
Al 23 qarashada qalalyq qoǵamdyq densaýlyq saqtaý basqarmasynyń baspasóz qyzmeti jarylysta kúiip qalǵan 3 adam jansaqtaý bóliminde jatqanyn habarlaǵan edi.
QR Tótenshe jaǵdailar ministrligi elordada jarylys bolǵan dámhanadan órt sóndirýshilerdiń 35 gaz ballonyn alyp shyqqanyn jariia etti.
