Nur-Sultan qalasy janynda «Saryarqa» magistraldy gaz qubyryn salý boiynsha qubyrlardy dánekerleýdiń sońǵy kezeńi aiaqtaldy, dep habarlaidy QazAqparat.
«Elbasynyń 5 áleýmettik bastamasy negizinde, elordaǵa gaz jetkizý maqsatynda, byltyrǵy jyldyń jeltoqsan aiynda «Saryarqa» magistraldy gaz qubyryn salý bastaldy. Al dánekerleý jumystary ústimizdegi jyldyń naýryz aiynda qolǵa alynyp, búgin mine 1061 shaqyrymdyq gaz qubyrynyń jumysy óz máresine jetti. Endi ýaqytta tehnikalyq jumystary qaldy, ol qarasha aiynda aiaqtalyp, jeltoqsanda gaz berile bastaidy. Odan ári qala ákimdigi tiisti organdarmen birige otyryp elordany tolyq gazben qamtýǵa múmkindigi bar. Bul elimizde júzege asyrylǵan iri infraqurylymdyq jobalardyń biri bolyp tabylady. Bul jobanyń maqsaty – elordamen qatar, oǵan jaqyn oblystar men eldi mekenderdi gazben qamtamasyz etý», - dedi «Samuryq-Qazyna» AQ basqarma tóraǵasy Ahmetjan Esimov.
Onyń málimdeýinshe, atalǵan gaz qubyry Qyzylorda–Jezqazǵan–Qaraǵandy–Temirtaý–Nur-Sultan marshrýty boiynsha tartylǵan.
«Magistraldy salýǵa 2 myńnan astam adam atsalysty. Bul rette, barlyq qurylys jumystary eńbekti qorǵaý talaptaryna qatań sáikestikte júrgizildi. Búgingi tańda, kestege sáikes, Jezqazǵan, Qaraǵandy, Temirtaý men Nur-Sultan qalalarynda gaz ólsheý stantsiiasy men 5 gaz taratý stantsiiasyn salý jumystary júrgizilýde»,- dedi ol.
Sondai-aq, A. Esimov elimizdiń basqa da óńirlerinde gazdandyrý protsesiniń odan ári kezeń-kezeńmen jáne josparly túrde damytý kózdelgenin aityp ótti.
