1 maýsym — Halyqaralyq balalardy qorǵaý kúni. Bul merekeni álem elderi 70 jyldan astam atap ótip keledi. Bul kúni balalarǵa arnalǵan túrli mádeni jáne oiyn-saýyq sharalary uiymdastyrylyp, sábilerdiń shattyqqa bólenetin kúni. QazAqparat tilshisi aitýly mereke qarsańynda Nur-Sultan qalasyndaǵy mamandandyrylǵan balalar úii direktorynyń orynbasary Anargúl Smaǵulovamen tildesken bolatyn.
«Elordadaǵy mamandandyrylǵan balalar úii 1933 jyly ashylǵan, 90 jylǵa jýyq tarihy bar. Basynda bir qabatty etip aǵashtan turǵyzǵan. 1987 jyly mamandandyrylǵan balalar úii dep ataýy ózgertildi. Sebebi bul jerge saý sábilerden bólek, densaýlyǵynda aqaýy bar nemese týa bitken kemistigi bar balalar da qabyldana bastady. Qazirgi ýaqytta ortalyqta 50-den astam sábi bar. Olardyń jas shamalary — 0-4 jas arasy. Jáne bizde 100-den astam qyzmetker eńbek etedi», - dedi Anargúl Smaǵulova.
Onyń aitýynsha, balalar úiinde tek tul jetim sábiler ǵana emes, sonymen qatar ata-anasy bar balalar da tárbielenýde.
«Keibir ata-analar áleýmettik jaǵdaiynyń tómendiginen otbasyn asyraý múmkindigi bolmaǵandyqtan, balalaryn bizdiń ortalyqqa ákeledi. Olardyń ishinde otbasylyq jaǵdaiy túzelgen soń, balalaryn qaita áketetin ata-analar bar, al keibiri qaityp oralmaidy. Ondai jaǵdaida biz ata-anasyn izdestiremiz, al odan nátije shyqpaǵan jaǵdaida quzyrly organdarǵa habarlaimyz. Bizdiń ortalyqta balalar 4 jasqa deiin bolady, odan keiin eresek balalar úiine, al erekshe kútimdi qajet etetin balalar arnaiy ortalyqtarǵa jiberiledi, bizdegi balalardyń 20 paiyzy múgedek nemese erekshe kútimdi qajet etedi», - deidi ol.
Odan ári balalar úii basshysynyń orynbasary sábi asyrap alýǵa qatysty áńgime órbitti.
«Sońǵy jyldary balalardy tek qazaqstandyq otbasylar asyrap alýda. Ókinishke qarai, tastandy balalardyń kóbisi ózimizdiń qazaq ultynan. Atap aitsaq, bizdegi balalardyń 70 paiyzy qazaqtyń qarakózderi. Jyl saiyn 30-dan astam balany otandastarymyz óz baýyryna basady, al byltyr 34 balany asyrap aldy. Bizdegi ár balanyń taǵdyry ártúrli: birin tastap ketse, ekinshisin ata-anasy asyrai almaǵandyqtan osynda ákelýge májbúr bolǵan. Osy oraida bizdiń mamandar olarǵa ana ornyna ana, áke ornyna áke bolyp, jan-jylýlaryn aiamaidy. Mamandandyrylǵan balalar úiinde barlyǵyna birdei tiisti jaǵdai jasalǵan, eshqaisysy nazardan tys qalmaidy. Sonymen qatar, bala tárbiesi men kútimine qajetti mamandardyń barlyǵy bar», - dedi A. Smaǵulova.
Mamannyń málimdeýinshe, eldegi tótenshe jaǵdaiǵa bailanysty balalar úiinde jumys kestesi ózgerip, sanitarlyq sharalar qatańdatylǵan.
«Karantinniń alǵashqy kúninen bastap, arnaiy bekitilgen qaýlynyń negizinde barlyq talartardy saqtai otyryp jumys isteýdemiz. Balalaryn ýaqytsha ákelgen ata-analar bizge telefon shalyp nemese video bailanys arqyly balalarynyń jaǵdaiyn qadaǵalaýda. Búgin mereke bolǵandyqtan, sanitarlyq erejelerdi saqtai otyryp, balalarǵa arnalǵan merekelik shara uiymdastyrýdamyz. Onda balalar án aityp, bi bilep óz ónerlerin ortaǵa salady. Sońynda estelik sýretke túsip, táttiler taratylatyn bolady»,t- dedi ol.
