Elordada jyl basynan beri sybailas jemqorlyqqa qarsy 82 qylmys tirkeldi.
Bul týraly Sybailas jemqorlyqqa qarsy is-qimyl agenttiginiń Nur-Sultan qalasy boiynsha departamenti basshysy Nurlan Qydyrbaev «Antikor.Live» jobasy aiasyndaǵy onlain brifingte aitty, dep habarlaidy QazAqparat tilshisi.
«Elordada jyl basynan beri 82 qylmys tirkeldi. Onyń 62-si - jergilikti sybailas jemqorlyqpen bailanysty aýyr qylmys. Olarǵa qatysty tergeý jumystary júrgizilip jatyr. Prezidenttiń bizge bergen tapsyrmasy boiynsha jumystar atqarylyp jatyr. Qazirgi ýaqytta áýejai boiynsha, Almaty aýdany ákimniń orynbasary jáne biraz laýazymdy qyzmetkerlerdiń qylmysy boiynsha tergeý jumysy júrip jatyr», - deidi Sybailas jemqorlyqqa qarsy is-qimyl agenttiginiń Nur-Sultan qalasy boiynsha departamentiniń basshysy Nurlan Qydyrbaev.
Onyń aitýynsha, byltyr atalǵan agenttikte memlekettik qyzmet boiynsha jeke bólim ashylǵan.
«Jeke bólingennen keiin bizdiń agenttikte parasattylyq, aldyn alý jáne seriktestik degen úsh departament paida boldy. Bul - óte durys sheshim. Osy baǵyttar boiynsha jumys istep jatyrmyz. Aldyn alý departamenti kóp qylmysty boldyrmaý úshin jumys isteidi. Bul baǵytta densaýlyq saqtaý, dene shynyqtyrý jáne basqa da departamentter boiynsha 8 syrtqy taldaý júrgizdik. Qazirgi kezde qaladaǵy mekeme basshylary men ákimdiktiń basqarmalarymen memorandýmǵa qol qoiyp, birge jumys istep jatyrmyz», - deidi ol.
