Nur-Sultan qalasynyń soty jýrnalist Irina Beketovany óltirgen qylmyskerdi 11 jylǵa bas bostandyǵynan aiyrýǵa úkim shyǵardy, dep habarlaidy "Ult aqparat".
«2019 jyldyń 23 sáýirindegi sot úkimimen A.M. Gýseinov QR QK 106-baby, 3-bóligi boiynsha ortasha qaýipsiz QAJ mekemesinde 11 jyl jazasyn óteidi. Jaza qylmys aiybyn aýyrlatatyn mán-jailardy eskere otyryp uiǵaryldy. Oqiǵa bolǵan kúni qylmysker alkogoldi ishimdikke mas bolǵan», - dep habarlady qalalyq sottyń baspasóz qyzmeti.
Sot sheshimimen aiyptalýshydan zardap shekken tarapqa 6 million teńge moraldyq ótemaqy óndiriledi. Onyń 4 million teńgesi I. D. Beketovanyń kámelettik jasqa tolmaǵan balalaryna beriledi.
Eske sala keteiik, 37 jastaǵy tilshi Irina Beketova qyrkúiek aiynda mert boldy. Quqyq qorǵaýshylar onyń azamattyq nekedegi kúieýi 34 jastaǵy Anatolii Gýseinov kúdikti retinde tanydy. Olardyń nekesinen eki bala dúniege kelgen.
IIM-niń málimetinshe, A.Gýseinov jýrnalist kelinshekti úidiń kireberisinde ózge er adammen turǵanyn kórgen. Beketova men Gýseinov arasynda urys-keris bastalǵan. Kelinshektiń tanysy ol jerden ketip bara jatyp, áiel soqqyǵa jyǵylyp jatqanyn estigen. «Qaita ainalyp, joǵary kóterilgende es-tússiz jatqan áieldi kórip, jedel járdem shaqyrǵan. Bul ýaqytta Gýseinov qashyp ketken», - dedi IIM resmi ókili.
Kóz jumǵan Irina Beketovanyń sońynda úsh uly men bir qyzy qaldy.
