Elordada jumys isteitin jastardan satyp alý quqyǵynsyz jaldamaly páterge ótinish qabyldaý merzimi bir kúnge uzartyldy, dep habarlaidy "Ult aqparat".
«2019 jyldyń 11 qarashasynda saǵat 12.20-da Smart Astana portalynyń jumysy qalpyna keltirildi. Jumys isteitin jastar úshin satyp alý quqyǵynsyz jalǵa beriletin turǵyn úige qujattardy qabyldaý aǵymdaǵy jyldyń 12 qarashasy saǵat 22.00-ge deiin uzartyldy», - delingen ákimdiktiń baspasóz qyzmeti taratqan habarlamada.
Aita ketsek, Jastar jylyna orai Elbasynyń tapsyrmasymen QR Aqparat jáne qoǵamdyq damý ministrligi memlekettik organdarmen birlese otyryp, Nur-Sultan, Almaty jáne Shymken qalalarynda jumysshy jastarǵa turǵyn úidi berý boiynsha erejelerdi bekitken bolatyn. Atalǵan tapsyrmany QR Tuńǵysh Prezdienti N.Á.Nazarbaev 2019 jyldyń 23 qańtarynda Jastar jylynyń ashylý saltanatynda bergen edi.
Páterge úmitkerdiń kásibi saladaǵy tiisti diplomy, sertifikaty bolýy kerek. Sonymen birge, ótinim bergen jastyń otbasynyń jáne balalarynyń bolýy eskeriledi. Máselen, eger ótinish berýshi mektep muǵalimi bolsa oǵan 5 upai, otbasynyń bolýyna 5 upai beriledi. Bala sanyna bailanysty 1 upaidan, ekinshi deńgeili bankte jinaq shotynyń bolýy 2 upaidan esepteledi. Jastar úshin jaldamaly páter berý baǵdarlamasy 2021 jylǵa deiin júzege asyrylady.
Ótinimdi 5-10 qarasha aralyǵynda tek elektrondy túrde «Smart Astana» mobildik qosymshasy arqyly berýge bolady. Jalǵa beriletin turǵyn úige 29 jasqa tolmaǵan, jalpy bilim beretin mektepterdiń, tehnikalyq jáne kásiptik, orta bilimnen keiingi, joǵary jáne joǵary oqý ornynan keiingi bilim berý uiymdarynyń oqý josparlaryn meńgergen jáne eńbek qyzmetin júzege asyratyn azamattar ótinish bere alady. Sonymen qatar, naryqta suranysqa ie 100 mamandyqtyń tizimine sáikes, kásipti igergen azamattar, jas otbasylar, jas kásipkerler, biýdjettik uiymdardyń qyzmetkerleri basym sanattarǵa jatady.
