Mýzykalyq jas kórermen teatrynda N.Moshinanyń «Dúnie-Ǵapyl» metafizikalyq dramasynyń premerasy ótti, dep habarlaidy "Ult aqparat".
Mýzykalyq jas kórermen teatry kórermen nazaryna «Dúnie-Ǵapyl» metafizikalyq dramasynyń premerasyn usyndy. Orys dramatýrgy Natalia Moshinanyń «Svet» atty shyǵarmasynan qazaq tiline alǵash ret aýdarǵan – Ashat Maemirov. Osylaisha, «Dúnie-Ǵapyl» qoiylymy qazaq teatrynyń sahnasynda kórermenge jol tartty. Qoiylymnyń qoiýshy rejisseri – Qazaqstannyń eńbek sińirgen qairatkeri Ashat Maemirov, mýzykamen kórkemdegen jáne rejisserdiń assistenti – Mekan Jumabaev, bas hormeister – N. Tilendiev atyndaǵy II Respýblikalyq derijer baiqaýynyń laýreaty- Álihan Ydyrysov, kostiým sýretshisi – Ińkár Karimova, jaryq sýretshisi – Aidyn Dosaev, dybys rejisseri – Sabina Iliasova, rejisserdiń kómekshisi – Ernazar Jańatilek.
Onyń janry – metafizikalyq drama. Metafizika – barlyq nárseniń arǵy jaǵynda kórinetin jáne kórinbeitin shyndyq. Túpki maǵynasynda «fizikadan keiin keletin» degendi bildiredi. Shyǵarmada barsha adamzatqa ortaq taqyryptar - ýaqyttyń qadiri, adamgershilik, ár istelgen istiń qaiyry men qaitarymy bolatyny jaily aiqyn kórsetildi.
Qoiylymdaǵy róli týraly Mazdaq atty keiipkerdi somdaǵan teatr akteri Orazaly Igilik bylai sipattaidy: «Mazdaq sekildi adamdar bul ómirde kezdesedi. Barlyq keiipkeler ómirden alynǵan. Biz barlyǵymyz arǵy ómirge baramyz. Qoiylym filosofialyq oilarǵa toly. Mazdaq balalar úiinde tárbielengen, sábi súie almaǵan. Ómirdiń túrli qiyndyǵyn kórgen adam. Onyń jubaiy Rimma ekeýi bir-birin jaqsy kóredi. Sondyqtan olar ajyrasyp ketpeidi».
Qoiylym barysynda Mazdaq (Orazaly Igilik), onyń jubaiy Rimma (Qazaqstannyń eńbek sińirgen qairatkeri, 71-shi Halyqaralyq Kann kinofestivaliniń jeńimpazy Samal Esliamova), Jasyn (Dinislam Nurmaǵanbetov), Súirik (Diana Asqar) esimdi keiipkerler demalys ornyna barar jolda jol kólik apatyna tap bolady. Bul jerde olardy Ǵaiyp esimdi beitanys qarsy alady. Keiipkerler óli men tiri arasyndaǵy ýaqytty bastarynan ótkizedi. Jalpy adamdardyń bul ómirden ótip, qiiametke deiingi ýaqytyn, eki dúnieniń ortasyndaǵy uzaqtyǵyna adamzat aqyly boilai almaityn qandai da bir ýaqyt aralyǵyndaǵy adam janynyń jaǵdaiy, rýhynyń háli sýretteledi.
