QR Tótenshe jaǵdailar ministrligi elordada jarylys bolǵan dámhanadan órt sóndirýshilerdiń 35 gaz ballonyn alyp shyqqanyn jariia etti, dep habarlaidy "Ult aqparat".
Ministrliktiń baspasóz qyzmeti 2020 jylǵy 21 qarashada saǵat 12.25-te Nur-Sultan qalasy TJD kezekshi-dispetcherlik qyzmetiniń pýltine Shubar shaǵyn aýdanyndaǵy «Halalbrothers» dámhanada gaz ballon jarylǵany, saldarynan órt shyqqany týraly habarlama túskenin jariia etti.
Órt sóndirýshiler oqiǵa ornyna saǵat 12.32-de kelgen boida jarylys saldarynan eki qabatty kottedjge japsarlas salynǵan qurylys pen qazandyqtyń ishinara qabyrǵalary jáne shatyry qulaǵany anyqtalǵan. Sonymen qatar 20 sharshy metr kólemde japsarlas salynǵan qurylys pen qazandyqtyń shatyry janǵan. Qurylystyń 100 sharshy metr kólemi qirap (jalpy kólemi 600 sharshy metr), jarylys saldarynan as úidiń shatyry qulaǵan.
«Elordalyq qutqarýshylar oqiǵa ornynan 35 gaz balondy shyǵardy. Úiindiniń arasynan 1998 jyly týǵan qyzdy qutqardy, ol jabyq bas mi zaqymyn alǵan. Ókinishke qarai, oqiǵa ornynda dámhanada ydys jýýshy bolyp qyzmet atqaratyn 1968 jyly týǵan áiel adam kóz jumdy», - dep habarlaidy ministrliktiń baspasóz hatshysy Talǵat Ýáli.
Jedel meditsinalyq kómek brigadasy 34 adamdy emhanaǵa jetkizgen. Onyń ishinde 11-i dáriger qaraǵannan keiin úilerine qaitarylyp, 23-i aýrýhanaǵa jatqyzyldy. Zardap shekken adamdardyń barlyǵy dámhana jumysshylary. Sondai-aq jarylys saldarynan 3 avtokólik ziian keltirildi.
«Kólemi 20 sharshy metr órt saǵat 12.58-de sóndirildi. Avariialyq-qutqarý jumystary saǵat 16.59-da aiaqtaldy. Órttiń shyǵý sebepteri anyqtalýda. Oqiǵa ornynda Nur-Sultan qalasy TJD, Apattar meditsinasy ortalyǵynyń 56 qyzmetkeri men 14 birlik tehnikasy jumys júrgizdi. Qala ákimdigi jáne TJ departmenti adamdar tońyp qalmas úshin KÝNG-kóligi men avtobýs jiberildi», - delingen habarlamada.
Oqiǵa ornynda halyqqa psihologiialyq kómek berý jáne aqparattyq qoldaý úshin qaýyrt jeli telefony jumys istedi 8-7172-24-51-71 i 8-7172-24-51-47. Oǵan 11 qońyraý túsken.
Aita keteiik, keshe elordada dámhanalardyń birinde gaz ballony jarylyp, 1 adam qaza tapty. Elorda aýrýhanalarynda 23 adam emdelip jatqany habarlanǵan bolatyn. Osy oqiǵadan keiin qaza tapqan qyzdyń otbasyna kómek kórsetiletindigin aitqan Nur-Sultan ákimi Altai Kólginov Tótenshe jaǵdailar departamenti men Politsiia departamentine qaladaǵy basqa da qoǵamdyq tamaqtaný nysandarynda órt qaýipsizdigi erejesiniń saqtalýyn tekserýdi tapsyrdy.
Al búgin qalalyq qoǵamdyq densaýlyq saqtaý basqarmasynyń baspasóz qyzmeti jarylysta kúiip qalǵan 3 adam jansaqtaý bóliminde jatqanyn habarlaǵan edi.
