Nur-Sultan qalasynda elektr qýatyn qalpyna keltirgen apattyq brigada jumysshylaryna syiaqy beriledi. Bul týraly Nur-Sultan qalasynyń Otyn-energetikalyq kesheni jáne kommýnaldyq sharýashylyq basqarmasynyń basshysy Ernat Bázil aitty, dep habarlaidy QazAqparat.
«Qala ákimi tez arada komissiia qurdy. Ol nysandarǵa eki saǵat saiyn baryp, barlyǵynan habardar bolyp otyrdy. Búgingi tańda 1,5 táýlik boiy jumys istegen 16 adamǵa syiaqy berý týraly tapsyrma berildi. Túnde -18 gradýs bolǵanyn jaqsy bilesizder. Olar osyǵan qaramastan, tynbai jumys istedi», - dedi Ernat Bázil elorda ákimdiginde ótken baspasóz máslihatynda.
Nur-Sultan ákimi Altai Kólginov te Instagram-paraqshasynda jumyskerlerge alǵysyn bildirdi. «Elektr jelilerin qalpyna keltirgen AREK qyzmetkerlerine alǵys aitamyn!», - dep jazdy ol.
Eske sala ketsek, 10 qarashada túngi saǵat ekide «Levoberejnaia» 110/10 kV shaǵyn stantsiiasynyń 10 kV kabel kanalynda órt shyǵyp, kabel liniiasy zaqymdandy. Saldarynan birqatar kóshedegi abonentter elektr jaryǵynan ajyratyla bastady. Bular - Qonaev, Syǵanaq, Túrkistan, Almaty jáne Dostyq kóshelerindegi barlyǵy 25 nysan men 7 turǵyn úi kesheni. Olardyń arasynda Aqorda, Parlament Senaty men Májilisi, Ministrlikter úii, Úkimet úii, Joǵarǵy sot, Ulttyq kitaphana, Ulttyq muraǵat ǵimarattary, «Báiterek» monýmenti bar. 11 qarasha, tańerteńgi saǵat 07.00-de energiia jartylai berile bastady.
Memleket basshysy Qasym-Jomart Toqaev oryn alǵan apatqa bailanysty Úkimetke arnaiy komissiia qurýdy tapsyrdy.
Búgin tús aýa Úkimet basshysynyń orynbasary Roman Skliardyń tóraǵalyq etýimen tótenshe jaǵdaidyń sebepterin anyqtaý jónindegi komissiianyń alǵashqy otyrysy ótti.
Oqiǵaǵa bailanysty qylmystyq is qozǵalyp, onyń aldyn ala sebebi ataldy.
