Elordada jaryqtyń sónip qalý oqiǵasyna bailanysty brifing ótti, dep habarlaidy "Ult aqparat".
«10 qarasha kúni saǵat 03:50 minýtta 101 qyzmetine habarlama kelip tústi. Aldyn ala málimet boiynsha, Syǵanaq kóshesi, 12-úidegi 5 metr elektr kabeli janyp jatqany anyqtaldy. Oqiǵaǵa bailanysty arnaiy shtab qurylyp, avariiany joiý jumystary belsendi júrgizildi», - Nur-Sultan qalasy Tótenshe jaǵdai departamentiniń ókili Raiymbek Álimǵazyuly.
Sondai-aq, Nur-Sultan qalasynyń Otyn-energetikalyq kesheni jáne kommýnaldyq sharýashylyq basqarmasy basshysy Ernat Bázil dál qazirgi ýaqytta qaladaǵy barlyq nysandarǵa jaryq berilgenin jetkizdi.
«Arnaiy top eki kún jumys istep, avariianyń saldaryn tolyq joidy. Qazirgi ýaqytta ǵimarattar men kóp qabatty keshenderdiń barlyǵyna elektr qýaty berildi. Tek «Báiterek» monýmenti men «Moskva» biznes ortalyǵy jarty saǵattan keiin elektr qýatyna qosylady», - deidi Ernat Bázil.
Kabeldik jelilerdi qalpyna keltirý úshin 15 adamnan turatyn avariialyq-qalpyna keltirý brigadasy men 8 arnaiy tehnika jumyldyrylǵan.
Eske sala ketsek, buǵan deiin Qasym-Jomart Toqaev elordadaǵy apatty jaǵdaiǵa bailanysty arnaiy komissiia qurýdy tapsyrǵan bolatyn. Qurylǵan komissiianyń alǵashqy otyrysy ótti.
Sondai-aq, elordada jaryqtyń sónip qalýyna bailanysty qylmystyq is qozǵaldy.
