Nur-Sultan qalasynyń bas memlekettik sanitar dárigeri Sarhat Beisenova elorda mektepteri men balabaqshalarynda jańa jyl merekesin ótkizý tártibin túsindirdi, dep habarlaidy QazAqparat.
«Mektepke deiingi balalar uiymdarynda jańajyldyq erteńgilikterdi toptyq oqshaýlaýdy qatań saqtaǵan jaǵdaida – ár top úshin jeke ótkizýge ruqsat etiledi. Iaǵni, qandai da bir jańajyldyq is-sharalardy ótkizý úshin toptardy biriktirýge jol berilmeidi. Úi-jailardy keiinnen jeldetý arqyly mindetti túrde ylǵaldy tazalaý júrgiziledi», - dedi Sarhat Beisenova elorda ákimdiginde ótken brifingte.
Spikerdiń aitýynsha, animatorlar men bóten tulǵalardy shaqyrýǵa jáne ata-analardyń qatysýyna tyiym salynady.
«Mektep erteńgilikterine kelsek, QR Bas memlekettik sanitar dárigeriniń qaýlysyna sáikes, mektepterde buqaralyq is-sharalar ótkizýge bolmaidy, ata-analardyń barýyna da ruqsat joq. Sondyqtan biz jańajyldyq merekelerdi ár synyp úshin jeke-jeke synyp saǵaty túrinde ótkizýdi usynamyz», - dep qorytyndylady dáriger.
