Elordadaǵy Ulttyq akademiialyq kitaphanada QR Parlament Senatynyń tóraǵasynyń qatysýymen «Shyǵystyń shoqjuldyzdary» atty halyqaralyq konferentsiia ótip jatyr, dep habarlaidy QazAqparat tilshisi.
Halyqaralyq túrki akademiiasy uiymdastyryp otyrǵan sharaǵa túrki tildes memlekettiń resmi tulǵalary men ǵalymdary, qoǵam qairetkeri qatysýda. Konferentsiianyń ashylýynda sóz sóilegen QR Parlament senatynyń tóraǵasy Máýlen Áshimbaev Qazaqstannyń kópvektorly syrtqy saiasatynda túrki áleminiń alatyn orny erekshe ekenin atap ótti.
«30 jyldyń ishinde elimiz álemdik qaýymdastyqtyń beldi jáne belsendi múshesine ainaldy. Táýelsizdik jyldary ulttyq negizimizge qaita oraldyq. Tarihymyzdy túgendedik, mádenietimizdi túzettik, ana tilimizdi tuǵyryna qondyrdyq.
Osy jolda bul baǵyttyń órkendeýinde «Mádeni mura», «Halyq tarih tolqynynda» siiaqty baǵdarlamalar úlken serpin berdi. Al «Rýhani jańǵyrý» baǵdarlamasy tutas ulttyń sanasyn jańǵyrtýǵa baǵyttaldy», - degen spiker kópvektorly syrtqy saiasat búginde óz nátijesin bergenin aitty.
«30 jyldyń ishinde túrki elderimen yntymaqtastaǵymyz jańa biikke kóterildi. Bul iste Elbasymyzdyń eńbegi eren ekeni sózsiz. Nursultan Ábishuly Nazarbaevtyń bastamasymen Túrki keńesi, TúrkPa, Túrksoi, Túrki akademiiasy sekildi bedeldi uiymdar quryldy. Jaqynda ǵana Túrki keńesi jandanyp, ony Túrki memleketteriniń uiymy retinde qaita qurý týraly tarihi sheshim qabyldanǵanyn bárimiz jaqsy bilemiz. Biyl naýryzda Túrkistan shaharynda Túrki tildes memleketterdiń yntymaqtastyq keńesiniń beiresmi sammiti ótti. Sol jiynda Prezidentimiz Qasym-Jomart Toqaev: «Bizdiń maqsatymyz – túrki álemin HHI ǵasyrda mańyzdy ekonomikalyq jáne mádeni-gýmanitarlyq keńistiktiń birine ainaldyrý», - degen edi.
«Qazirgi tańda ekonomikalyq yntymaqtastyqty damytýdyń mańyzdy ekeni túsinikti», - dedi Máýlen Áshimbaev.
Onyń aitýynsha, ekonomikalyq yntymaq arqyly tutas túrki keńistiginiń bailanysyn nyǵaityp, ál-aýqatyn arttyrýǵa múmkindik týady.
«Sonymen qatar rýhani úndestigimizdi damytýǵa da airyqsha mán berýimiz kerek. Bir kezeńde túrki jurty bilim men ǵylymnyń iri ortalyǵy boldy. Túrki álemi aitýly tulǵalardy ómirge ákeldi. Álem jurtynyń nazaryn aýdardy. Jańa zamanda da osy biikke kóterilýge bar kúshimizdi salýymyz kerek. Osy jolda Prezidentimiz aitqandai, ekonomikamen qatar mádeni-rýhani baǵyttarǵa da úlken mán berýimiz shart», - dedi Senat tóraǵasy.
Shara túrki halyqtary ádebietiniń klassikteri Nizami Gánjaýidiń týǵanyna 880 jyl, Álisher Naýaidyń týǵanyna 580 jyl jáne Iýnýs Emreniń dúnieden ótkenine 700 jyl tolýyna orai ótip otyr.
