Elordada Senat depýtatyn sailaý el zańnamasyna sai ótti. Bul pikirdi Túrkitildes memleketter yntymaqtastyǵy keńesi missiiasynyń basshysy, Ázerbaijannyń Qazaqstandaǵy Elshisi Rashad Mammadov aitty, dep habarlaidy QazAqparat.
«Bul sailaýǵa halyqaralyq baiqaýshy retinde qatysyp otyrmyz. Óte kóp kezdesý ótkizdik. Keshe Qazaqstan Ortalyq sailaý komissiiasynda kezdesý boldy. Nur-Sultan qalasy ákimdiginde de kezdesý ótkizip, QR Parlamenti Senaty depýtattyǵyna kandidattarmen kelissózder uiymdastyrdyq. Nur-Sultan qalalyq máslihatynyń depýtattarymen áńgimelestik. Al búgin Nur-Sultan qalalyq sailaý ýchaskesi ashylǵan sátten, saǵat 10-nan beri osy jerde júrmiz», - dedi ol.
Onyń atap ótýinshe, Qazaqstanda da, bizdiń Túrkitildes memleketterde de koronavirýs indetiniń taralýyna bailanysty bul sailaýǵa úlken delegatsiia kele almaǵan. Túrki keńesi osynaý uiymǵa múshe eldermen, quryltaishylarymen aqyldasa otyryp, Qazaqstandaǵy diplomatiialyq missiialarynyń ókilderinen sheteldik baiqaýshylar jasaqtaý týraly sheshim qabyldaǵan.
«Ázerbaijan biyl bul uiymǵa tóraǵalyq etedi. Sondyqtan QR Parlamenti Senaty depýtattaryn sailaýdy baiqaýshylar missiiasyna Ázerbaijannyń Qazaqstandaǵy Tótenshe jáne Ókiletti Elshisi retinde men tóraǵalyq qyzmetin atqaramyn. Delegatsiia quramyna Qyrǵyzstan, Ózbekstan, Túrkiia jáne Ázerbaijan elderi kiredi. Búgin biz kandidattardy, baiqaýshylardy, BAQ ókilderin tirkeý sátinen bastap monitoring júrgizdik. Máslihattyń Nur-Sultan qalalyq sailaý komissiiamen birlesken otyrysyna qatystyq. Daýys berý protsesine baqylaý jasadyq, ol óte jaqsy, ashyq ótti. Tańdaýshylardyń barlyǵyna qolaily jaǵdai jasalǵan. Ókinishke orai delegatsiiamyz óte shaǵyn bolǵandyqtan Nur-Sultan qalasynan basqa óńirlerge bara almadyq. Degenmen, sailaýdyń demokratiialyq jaǵdaida, Qazaqstan zańnamasyna sai ótti dep aitýǵa bolady», - dedi Rashad Mammadov.
