Foto: Qazaqkontsert baspasóz qyzmeti
Roza Baǵlanova atyndaǵy «Qazaqkontsert» memlekettik akademiialyq kontserttik uiymynda Qazaqstan Respýblikasy Konstitýtsiiasynyń 30 jyldyǵyna arnalǵan aqyn-sazger, Mádeniet salasynyń úzdigi, respýblikalyq patriottyq ánder baiqaýlarynyń birneshe márte júldegeri Erqoja Tilepberdievtiń «Rýh qanatynda» atty shyǵarmashylyq keshi ótti.
Is-sharanyń maqsaty – Ata Zańymyzdyń 30 jyldyǵyn atap ótý, onyń mańyzdylyǵyn nasihattaý, azamattardy memleketke adal qyzmet etýge shaqyrý, birlikke, yntymaqqa jáne otansúigishtikke úndeý.
Kontserttik baǵdarlamada avtordyń kópshilikke beimálim, áskeri-patriottyq, klassikalyq, lirikalyq jáne estradalyq ánderi shyrqaldy. Sondai-aq, Erqoja Tilepberdievtiń óleńderine án jazǵan kompozitorlar men onyń áýenderine sóz jazǵan aqyndardyń tanymal týyndylary oryndaldy. Kesh barysynda «Áskeri kernei», «Jumaq meken», «Jalǵyz sát», «Raiymbek batyr», «Qazaqstanym – Otanym meniń», «Ofitser myrzalar», «Eldiń qorǵany», «Abylai han» jáne t.b. ánder kórermen nazaryna usynyldy.
Aita keterligi, bul keshte alǵash ret «Qazaqkontsert» ártisteri men QR Qarýly Kúshteri quramyndaǵy ónerpazdar birlesip óner kórsetedi.
Foto: Qazaqkontsert baspasóz qyzmeti
Is-sharada Qazaqstannyń eńbek sińirgen qairatkerleri Qurmash Mahan, Klara Tólenbaeva, Nurbolat Arzamas, «Daryn» memlekettik jastar syilyǵynyń laýreaty Álibek Almadiev, «Qurmet» ordeniniń iegeri Aizada Kaponova, respýblikalyq jáne halyqaralyq baiqaýlardyń laýreattary Aibek Ábdiashimov, Birjan Aitahmet, Aidos Saniiazbek, IbraHim Amin, sondai-aq, «Astana sazy» memlekettik folklorlyq ansambli, «Gúlder» jáne «Birlik» ansamblderi, «Astana Musical» memlekettik miýzikl teatry, «Halyq Qazynasy» ulttyq óner ortalyǵynyń ártisteri men mádeniet maitalmandary óner kórsetti.
Sonymen qatar keshke QR Qorǵanys ministrliginiń QR Qarýly Kúshteriniń Ulttyq áskeri-patriottyq ortalyǵy, QR Ulttyq Ulanynyń án-bi ansambliniń solisteri, «Erler» hory jáne áskeri orkestri, QR Memlekettik kúzet qyzmeti orkestri, QR UQK Shekarashylar qyzmeti án-bi ansambliniń jáne Ulttyq Delfii oiyndarynyń jeńimpazdary qatysty.
Erqoja Álǵojauly Tilepberdiev - 1960 jyly Almaty oblysynda dúniege kelgen. Ol Aleksandr Borodinniń «Polovetskie pliaski» operasynan úzindi, Aleksei Mozgovoi, shved RnB oryndaýshysy, kompozitor Maher Zeinniń jáne t.b. shetel kompozitorlarynyń shyǵarmalaryn qazaqshaǵa aýdarǵan. Sondai-aq, 5-shi dúniejúzilik Kóshpendiler oiynynda oryndalǵan «Biz birgemiz!», kompozitor S. Erkimbekovtyń Roza Baǵlanovanyń 100 jyldyq mereitoiyna orai arnap jazǵan «Dala qyzy», Uly Otan soǵysynyń 80-jyldyǵyna arnalǵan «Qarýly kúshter», «Ardagerler» atty ánderdiń mátinin jáne «Qaýipsizdik qorǵany», «Áskeri kernei» ánderin jazǵan. Buǵan qosa, Qalibek Qýanyshbaev atyndaǵy Qazaq ulttyq mýzykalyq-drama teatrynyń «Don Kihot» qoiylymynda «Besik jyry» áni oryndalyp keledi.
E. Tilepberdiev «Talqainarym tamyrym», «Tabyndyrǵan Táńirtaý», «Dóńgelengen dúnie», «Aqqýlar áýeni», «Ana shýaǵy», «Júrek úni», «Baqytym baitaq dalam», «Balalyq shaq baqytym», «Meniń ánim – Muqaǵali», «Meniń rýhym – Raiymbek» jáne t.b. partitýralar men jyr jinaqtardyń avtory.
