Elordada koronavirýs infektsiiasy boiynsha PTR testten ótý aqysy qansha bolady? Bul suraqqa Nur-Sultan qalalyq qoǵamdyq densaýlyq saqtaý basqarmasynyń basshysy Sáýle Qisyqova jaýap berdi, dep habarlaidy "Ult aqparat".
«Jalpy tekserýden tiisti azamattar (iaǵni virýs juqtyrý kúdigine ilingender men koronavirýsty juqtyrǵan azamattarmen qarym-qatynasta bolǵandar) ótedi. Onyń bári tegin. Al Almaty men Nur-Sultan qalasy arasynda áýe reisiniń qalpyna keltirilýine bailanysty ol endi mindetti túrde ótetin jaǵdai (...) Qalada birneshe zerthana bar. Jaýapkershiligi jeke ujymdardyń baǵalarynyń mólsheri 11-20 myń teńge arasynda», - dedi Sáýle Qisyqova Densaýlyq saqtaý ministrliginiń Facebook-tegi paraqshasynda bergen suhbatynda.
Basqarma basshysy PTR testten kimder tegin óte alatynyn aityp ótti.
«Aldyn ala tekserý jumystaryna sáikes tizimge engen azamattar, iaǵni indetti juqtyrǵandarmen jaqyn qarym-qatynasta bolǵandardyń bári tegin ótedi. Odan bólek aldyn alý jumystary boiynsha PTR testterden meditsinalyq qyzmetkerlerdi ótkizemiz. Blok-postta qyzmette turǵandardy, memlekettik-áleýmettik uiymdardaǵy azamattardy da testpen tekseremiz. Qazir biz elordada №2 emhanany bólip qoidyq. Iaǵni JRVI infektsiiasyn juqtyrǵan azamattar da sol jerge tegin túrde ótedi. Búgingi kúni №6 jáne №9 emhanada provizorlyq bólimshelerdi ashyp qoidyq. Bul klinikaǵa jatqyzylar aldynda naýqastar sol jerde mindetti túrde testten ótedi. Sonymen qatar júkti áielderde 37-shi aptada PTR testterden ótkizemiz», - dedi ol.
