Foto: Astana qalasy ákimdigi saitynan alyndy
Qazaqstanda 2013 jyldan bastap qyrkúiektiń ekinshi jeksenbisinde Otbasy kúni atalyp ótedi. Biyl bul kún 8 qyrkúiekke túsip tur. Qoǵamnyń mańyzdy institýty otbasy qundylyqtaryn dáripteitin is-sharalar elimiz ben elordada kóptep ótkizildi. Solardyń biri «Otbasylyq qundylyqtardy dáripteý» taqyrybyndaǵy jiyn Astanadaǵy Politsiia departamentinde uiymdastyryldy, dep habarlaidy elorda ákimdiginiń resmi saity.
Jiyn moderatory Astana qalalyq PD Jergilikti politsiia qyzmeti basqarmasynyń bastyǵy, politsiia polkovnigi Erjan Ádilbekov qoǵamda otbasy árqashan rýhani jáne mádeni dástúrdiń saqtaýshysy, túrli býyndar arasyn jalǵastyrýshy bolǵanyn jáne solai bolyp qala beretinin jetkizdi.
“Otbasy kúni bizdiń qoǵamda rýhanilyqty, ónegeni nyǵaitýǵa, erli-zaiyptylardyń jaýapkershiliginiń mańyzdylyǵyn sózsiz moiyndaýǵa yqpal etedi. Otanǵa degen súiispenshilik otbasynan bastalady. Týǵan shańyraqtan alǵan tárbie – óskeleń urpaqtyń baqýatty da tabysty bolashaǵynyń kepili. Otbasylyq qundylyqtardy, kópbalalyqty nasihattaý - memleketimizdiń eń basty mindetteriniń biri. Táýelsizdik jyldary 6 millionnan asa qazaqstandyq dúnie esigin ashty. Al el azamattarynyń jalpy sany 19 millionnan asty. Bul Qazaqstandaǵy otbasylyq-demografiialyq saiasattyń durystyǵynyń, halqymyzdyń ál-aýqatynyń artqandyǵynyń aiǵaǵy”, - dedi ol.
Astana qalasy áielder isteri jáne otbasylyq-demografiialyq saiasat boiynsha komissiia tóraǵasynyń orynbasary Nazgúl Maqjan bolashaq jar, ana bolatyn qyzdarymyzdyń tárbiesine muqiiat qaraý kerektigin aitty.
“Byltyrdan beri elimizde turmystyq zorlyq-zombylyqqa qarsy biraz is-sharalar qolǵa alyndy, zań tarapynan da oń ózgerister boldy. Solardy iske asyratyn azamattar retinde sizderge qyz balanyń qoǵamdaǵy orny týraly aitqym keledi. Bizdiń ata-babalarymyz balanyń tárbiesine óte muqiiat qaraǵan. Osy rette barshańyzdy jumystyń qaýyrttyǵyna qaramastan balalaryńyzǵa durys kóńil bólýińizdi suraimyn, elimizdiń abyroiy men otbasy uiytqysy bolatyn qarakóz qyzdaryńyz ben qaryndastaryńyzǵa qamqor bolyp, tárbiesine mán berseńizder”, - dedi N. Maqjan.
Sonymen qatar, Astana ákimdigi janyndaǵy balalar quqyǵyn qorǵaý jónindegi komissiia múshesi, «Ákeler odaǵy» Respýblikalyq qoǵamdyq birlestigi tóraǵasynyń orynbasary, «Ákeler odaǵy» birlestigi Astana qalalyq filialynyń bastyǵy Bekdaiyr Kúzembai qoǵamdaǵy, jalpy otbasyndaǵy ákelerdiń róline toqtaldy.
Jiynda “Senimen Bolashaq” RQB ókili Indira Toqmýrzina da sóz sóilep, tártip saqshylarynyń qoǵamdy tolǵandyrǵan suraqtaryna jaýap berdi.
