Elordada jańa jyldyq is-sharalar barlyq bilim berý uiymdarynda bekitilgen josparǵa sáikes onlain formatta ótedi. Bul týraly Nur-Sultan qalalyq bilim basqarmasynyń basshysy Sholpan Qadyrova aityp berdi, dep habarlaidy QazAqparat.
«Qazirgi tańda ata-analardy bilim berý uiymdarynda jańa jylǵa arnalǵan merekelik sharalardyń qalai ótetitini týraly suraq mazalaitynyn bilemin. Jańa jyl – bul jai ǵana mereke emes, ár bala úshin ǵajaiyptyń belgisi ispettes. Jańa jyl qarsańynda bilim berý uiymdarynda buryn shyrshalar bezendirilip, ádemi kiimdersiz jáne tátti syilyqtarsyz ótkizilmeitin. Alaida karantindik shekteý sharalaryna bailanysty bilim berý uiymdarynda joǵaryda atalǵan is-sharalardy ótkizýge jol berilmeidi», - dedi Sholpan Qadyrova elorda ákimdiginde ótken baspasóz máslihatynda.
Onyń aitýynsha búgingi kúni mektepke deiingi uiymdarda árbir topta barlyq sanitarlyq talapty saqtai otyryp, ata-analardyń qatysýynsyz «Qosh keldiń, Jańa jyl» taqyrybynda merekelik sabaqtar ótkizilýde. Jańa jyldyq sabaqtardy ótkizý úshin toptar taqyrypqa sáikes bezendirilgen. Ár topqa shyrsha ornatylǵan. Sabaq stsenariiine sáikes ár bala merekelik kiimmen qatysady. Sonymen qatar, Qazaqstan Respýblikasy Prezidentiniń jáne Nur-Sultan qalasy ákiminiń atynan mektep oqýshylaryna jańa jyldyq syilyqtardy tabystaý boiynsha jumystar uiymdastyrylýda.
«QR Prezidentiniń atynan jańa jyldyq syilyq jiyntyǵy ata-anasynyń qamqorlyǵynsyz qalǵan jetim balalar men erekshe bilim berý qajettilikteri bar 200 balaǵa beriledi. Keshe, iaǵni 24 jeltoqsanda balalarǵa jańa jyldyq syilyqtar, iaǵni - Prezidenttiń quttyqtaý haty, kitap jáne «Orchestra» dúkenderinen kiim satyp alýǵa 100 myń teńgege sertifikat, táttiler men ústel oiyny tabystaldy. Al 25 jeltoqsan kúni Nur-Sultan qalasy ákiminiń atynan jańa jyldyq syilyq jiyntyqtary az qamtylǵan, kóp balaly jáne tolyq emes otbasylardan shyqqan balalarǵa, jáne ár túrli jetistikterge jetken daryndy 450 balaǵa tabystalady. Balalarǵa jańa jyldyq syilyqtardy Aiaz Ata men Aqshaqar sanitarlyq normalardy saqtai otyryp, balanyń úiine baryp saltanatty túrde tabystaidy. Jańa jyldyq is-sharalar barlyq bilim berý uiymdarynda bekitilgen josparǵa sáikes onlain formatta ótedi», - dedi ol.
